Afortunadamente, a cidadanía está cada vez máis sensibilizada e comprometida coa defensa dos nosos ríos como proba a Lei de Defensa dos Ríos Galegos aprobada en 2006 mediante unha ILP. No entanto, e malia á abondosa lexislación de protección das augas, as administracións amosan unha descarada insubmisión e desleixo á hora de tomar medidas para garantir o bó estado das nosas augas, como pretenden a Directiva Marco da Auga e a de Depuración de Augas residuais, en cuxa aplicación Galiza leva un escandaloso retraso.
Dende ADEGA e o Proxecto Ríos estamos a colaborar para que a cidadanía sexa cada vez máis consciente e activa na defensa dos nosos ríos, suplindo deste xeito a falta de interese das administracións.
Por iso, imos celebrar o Día Mundial da Auga facendo unha saída de inspección ao río Sarela, en Compostela, para avaliar o seu estado e validar as novas metodoloxías e materiais para a inspección de ríos que pretendemos poñer en marcha este ano 2010. Estes novos métodos axústanse máis ás demandas da Directiva Marco da Auga en relación á diagnose do estado de saúde dos ecosistemas fluviais.
Faremos esta inspección nun treito do Sarela, dende o Romaño até o Muíño do Lermo. Será o luns 22 de 16:00 a 19:00h. Se queres participar, podes anotarte chamando ao 981 57 00 99 ou ao 619 672 038. Tamén podes mandar un correo electrónico a: pacobanhobre@adega.info, coordenador da actividade.