O estudo é nun informe vinculado ao plan estratéxico de turismo que ten como obxectivo radiografiar o papel da profesionalidade, a ocupación, a formación e a calidade do servizo na actividade turística. Unha análise realizada por responsables de turismo e da formación de persoal en diversos ámbitos turísticos cun alto contido de autocrítica sobre a situación actual.
A análise pon en primeiro lugar de manifesto a alta porcentaxe de traballadores non cualificados, moitos deles inmigrantes que recorren a esta actividade como refuxio laboral, así como os baixos salarios e a falta dun sistema de incentivos salariais que estimulen a superación do traballador e a súa implicación por dar un servizo de calidade. “Os salarios non son moi altos e normalmente non compensan o esforzo e o custo de formarse, sen contar coa economía en negro sobre todo en combites e fins de semana”, conclúe a análise respecto da situación das condicións de traballo actuais no sector. Por iso, propón que se xeneralice un novo sistema retributivo que conxugue salarios con capacitación e produtividade, así como crear un certificado similar aos ISO que sinale as empresas e establecementos que apostan pola calidade e a profesionalidade do empregado.
A lista de deficiencias por liquidar céntrase tamén no papel dos empresarios. Aínda que recoñecen que existen certas estruturas profesionalizadas, sobre todo en hostalería “principalmente grupos empresariais da restauración con máis de catro ou cinco establecementos”, pon en cuestión aos empresarios do sector e a súa visión do negocio. O feito de que maioritariamente sexan empresarios autónomos ou empresas familiares, moitos sen formación específica, leva aos responsables da análise a concluír que “non consideran prioritario deseñar itinerarios co fin de modernizar a xestión dos seus negocios. Fai falta, xa que logo, en boa parte do sector, unha cultura empresarial moderna, que aposte pola profesionalización e a modernización”.
Aínda que a formación dos traballadores representa un factor crave, os expertos son críticos co panorama actual. Consideran que un dos principais problemas son a atomización e o exceso de oferta pero falta coordinación entre todos estes niveis formativos. Tamén cuestionan o baixo nivel sobre o coñecemento da lingua inglesa, unha constante sen resolver como mínimo nos últimos cinco anos.
O estudo conclúe cun aspecto que dependendo da súa lectura pode ser tan positivo como negativo. Positivo, porque os empresarios buscan aos mozos que se están formando para formar o seu persoal. Negativo, porque moitas veces non deixan que acaben o seu proceso de formación. O resultado: profesionais a medio formar non afeitos a altos niveis de esixencia e que por falta de persoal saen antes de tempo ao mercado laboral.
Otero Regal