O Grupo de Teatro Xuvenil “A Maseira”, dos concellos de Alfoz e O Valadouro chegou xa ó seu terceiro ano de existencia. Agora, a finais do presente mes de xuño, estreará a que será a súa quinta obra, a titulada “A invasión dos galiñomes”. Nesta obra participan 16 alumnos da ESO do instituto Alfoz-Valadouro, dirixidos por Mirta García, Suso Rubio e Pepe Peinó. A estrea terá lugar o vindeiro sábado, día 28 de xuño, ás 20,00 horas, no Salón de Actos da Casa da Cultura “Manuel Lourenzo”, do Valadouro. Logo, ó seguinte sábado, o día 5 de xullo, tamén ás 20,00 horas, a obra repetirase na Casa da Cultura de Alfoz.