A asociación Mulleres de San Ciprián revivirá a tradición de ir lavar ó río

A asociación Mulleres de San Ciprián ten preparada unha actividade de lembranza que consistirá en revivir a tradición de ir lavar ao río e que terá lugar o 25 de maio. Un evento que levará consigo a recreación do ambiente que se vivía hai unhas décadas cando as mulleres de San Cibrao se xuntaban para ir lavar a roupa nas beiras do río Covo, concretamente dende o muíño ata a ponte romana.

Para iso, todas as persoas participantes reuniranse ás 17:00 horas na praza situada ao carón da Casa da Cultura, que será o punto de encontro, ataviadas cos utensilios propios para lavar como son a táboa, a tina, o xabón ou a roupa. Dende alí sairán camiñando en comitiva, falando e cantando cancións tradicionais, cara a área recreativa situada ao carón da ponte romana. Unha vez alí, procederán a lavar as pezas de roupa e, ao rematar, gozarán dunha merenda de convivencia.

Con esta actividade a asociación pretende “lembrar e reivindicar o sacrificio e o duro traballo da muller, destacando o sobreesforzo que implicaban as tarefas do fogar nunha época na que non existían ou as familias non se podían permitir algo tan habitual hoxe en día como unha lavadora e na que por exemplo, para lavar a roupa, había que saír ao río, en todas as estacións do ano, e lavar a man, peza por peza, nas frías augas do Covo” explica a presidenta da entidade, Amparo Pernas.

Mulleres de San Ciprián quere convidar a todas as persoas “homes e mulleres, pequenos e adultos, a revivir de novo esta tradición para coñecer de primeira man o duro traballo da muller” engade Pernas. Por iso, a presidenta da asociación explica que “para os máis novos pode ser unha actividade moi interesante na que poderán experimentar como era a vida hai unhas décadas”. No seu momento a asociación informará da apertura do prazo para poder inscribirse nesta actividade.