O Concello de Viveiro fai un chamamento á responsabilidade da veciñanza para respectar todas as medidas e recomendacións das autoridades sanitarias na fase 1

 Viveiro, 13 de maio de 2020. A alcaldesa de Viveiro, María Loureiro, mantivo unha reunión coas forzas de seguridade para concretar as diferentes medidas de flexibilización ou restricción na actual fase 1 da desescalada, demandando responsabilidade á veciñanza para respectar todas as recomendacións e indicacións das autoridades sanitarias.
O concello lembra que no núcleo de poboación de Viveiro seguen vixentes as franxas horarias para facer deporte ou pasear:
-Ata tres menores de 14 anos poden saír cun proxenitor, unha vez ao día e a unha distancia máxima dun quilómetro entre as 12 da mañá e as 7 da tarde.
-Os maiores de 14 anos ata 70 poderán saír a facer deporte sempre de maneira individual e mantendo as distancias sociais ou a dar un paseo cun membro da unidade familiar de convivencia, desde as 6 ás 10 da mañá e de 20 a 23 horas.
-Os dependentes que precisan un acompañante e os maiores de 70 anos teñen reservada tamén unha franxa horaria: de 10 a 12 da mañá e unha hora pola tarde, de 19 a 20 horas.
Nos demais núcleos de poboación non hai restricción horaria de 6 a 23 horas, pero tamén é importante non superar unha hora de deporte ou paseo (que pode ser con menores).
Con respecto ás terrazas, non hai limitación ou franxa horaria e os nenos poden ir, pero deben estar cos adultos, non xogando nos arredores. O concello solicita aos establecementos de hotalería que vele polo respecto das distancias sociais.
Por últmo, o concello recomenta as consultas médicas por teléfono sempre que sexa posible e que sexa o médico o que determine se é necesaria unha consulta presencial.
“A evolución da pandemia é boa en Viveiro, pero é importante non dar pasos atrás, polo que pedimos a colaboración de todos os veciños e veciñas, que ata o de agora tiveron un comportamento exemplar”, engade a alcaldesa, María Loureiro.