Por fin. Galicia, despois de décadas de agardar, consegue asumir a xestión da súa costa. É unha boa nova, sen dúbida, e hai que felicitar ao presidente Rueda por ter pechado esta transferencia. Non é un paso menor: falamos de máis de 1.500 quilómetros de litoral, cun impacto directo na planificación, na protección ambiental, no desenvolvemento económico e, sobre todo, no sentido común territorial e na identidade. Pero ollo, que non nos cegue a marea e o bo tempo.
Primeiro, os cartos. 1,2 millóns anuais e unha partida inicial de 687.000 euros. En serio? Ese é o valor que o Estado lle dá a unha das nosas maiores riquezas naturais e produtivas. É unha cifra ridícula, que non se corresponde nin coas necesidades nin co potencial que asume Galicia. Hai consellerías que gastan máis só en informes. Se queremos facer as cousas ben, isto non pode saír sempre unicamente do peto de Galicia.
Segundo, chega tarde. Dende a aprobación do Estatuto en 1981, levamos máis de corenta anos agardando que se cumpra. E aínda hoxe, para que esta transferencia fora posible, tivemos que aprobar unha lei propia no Parlamento galego, enfrontándonos ao Estado. Un proceso innecesario se houbese vontade real de recoñecer o noso autogoberno.
E o que é máis grave: a transferencia da costa é só unha das moitas que Galicia leva décadas reclamando. Seguimos sen competencias sobre a AP-9, sen xestionar o Ingreso Mínimo Vital, sen ferramentas propias en política laboral ou migratoria. Todo iso segue centralizado en Madrid un sen xeito.
E aquí tamén cómpre dicilo: o BNG, que leva meses proclamando que ten a chave do Goberno central grazas ao seu deputado en Madrid, ten pouco ou nada que amosar en termos de resultados concretos para Galicia. Moito ruído, moita declaración simbólica, pero as competencias seguen sen vir. E mentres uns botan a culpa a outros, quen perde é o país.
Aínda así, hoxe é un bo día. Porque a descentralización funciona. Porque cando se xestiona dende aquí, faise mellor. Porque non se trata de privilexios, senón de eficacia, de coñecer o territorio, de tomar decisións adaptadas á nosa realidade co sector e coa sociedade.
Galicia precisa máis competencias, máis ferramentas, máis capacidade de decisión. E precisa tamén demostrar que, cando se nos dá a responsabilidade, estamos á altura.
Agora toca sentidiño. Cabeciña para ordenar, para priorizar, para facer da industria costeira un motor sostible, moderno e competitivo. A costa non pode ser nin unha postal baleira nin un desorde sen sentido. Temos talento, temos universidades, tradición mariñeira e empresas punteiras. Fáltanos planificación valente e estabilidade normativa.
Hoxe celebramos. Pero mañá toca seguir reclamando. Porque o importante non é só ter o timón, senón saber cara onde navegamos. E ter marabillas na costa non serve de nada se seguimos atados de mans dende terra firme.
Juan Carlos Piñeiro Docampo
Sº Xeral de CxG
Membro dirección do Partido Demócrata Europeo
Ocorreu minutos antes das 15 horas e o vehículo obstaculizaba a circulación. O 112 Galicia tivo constancia deste accidente a través dun particular: un camión acababa de envorcar no quilómetro 10 da LU-541, en Ladra (Vilalba). Nun primeiro momento pensouse que o condutor podía estar atrapado, mais conseguiu saír polo seus propios medios. No operativo participaron Urxencias Sanitarias de Galicia-061, os Bombeiros de Vilalba, a Garda Civil de Tráfico e os servizos de mantemento da estrada. O vehículo perdeu algo de combustible como consecuencia do impacto, pero os bombeiros resolveron rapidamente a situación.
No marco desta iniciativa, a asociación realizará o 6 de maio unha viaxe a Monforte, que incluirá visitas ao Museo do Ferrocarril ou ao Pazo de Tor, ao conxunto monumental de San Vicente do Pino, ao Centro do Viño da Ribeira Sacra e unha explicación exterior do Colexio de Nosa Señora da Antiga. As persoas interesadas en participar poden inscribirse entre o 10 de marzo e o 10 de abril chamando ao 660 47 72 30 ou escribindo ao correo vencelloburela@gmail.com.
Esta iluminación comezará acendendo en días sinalados, nos que se celebre ou queira darlle visibilidade a algún acontecemento. “Pareceunos un bo día este 8 de marzo, no que conmemoramos o Día da Muller, comezar o uso desta instalación”, explica a concelleiro de alumeado, Ángel Fernández Neira. “As letras de Foz son un signo de identidade do noso pobo e esta iluminación dálles unha nova vida”, explica o alcalde, Fran Cajoto.
Durante a visita, as representantes municipais fixéronlle entrega dun ramo de flores e compartiron con ela un momento moi agradable, celebrando xuntas esta data significativa. Con este xesto, o Concello quixo recoñecer e poñer en valor ás persoas maiores de Burela, que forman parte fundamental da comunidade e son depositarias da memoria, da experiencia e dos valores do municipio.
O 14 inaugúrase o Rincón da Poesía, con música de gaitas e concerto de Xuaco Amieva, ademais da presentación de Viaxe a Dacondo I. O 21 terá lugar un recital poético-musical na Casa de Cultura, con música en directo, participación de autores locais, presentación do libro Tu voz en mi voz e homenaxe a Luis Pérez del Súcaro.
Este domingo, 8M, celebrouse un xantar no restaurante O Noso Lar no que participaron máis de 100 mulleres con posterior baile na Casa do Mar.
Reuniu na xornada deste sábado no pavillón de deportes a 700 ximnastas procedentes de diferentes puntos da provincia de Lugo e tamén dun club convidado de Pontevedra. Foi un día intenso de deporte e de convivencia, que tivo unha importante repercusión na hostalería local. Desde o Concello felicitan a todas as participantes, subliñan o traballo da organización (Escola Porta Norte) e agradecen o apoio das entidades colaboradoras.
