A Concellaría de Servizos Sociais de Ribadeo iniciou o reparto de 1.410 máscaras infantís doadas pola Deputación

 Ribadeo, 19 de xuño de 2020. A Concellaría de Servizos Sociais de Ribadeo iniciou hoxe o reparto de 1.410 máscaras infantís. Foron doadas pola Deputación de Lugo e chegarán nunha primeira fase a 83 menores de 54 familias vulnerables.
A edil Mónica Freire explicou que “desde a área de Servizos Sociais entendemos que é prioritario destinar estas máscaras, neste caso infantís, facilitadas pola Deputación Provincial, para axudar ás familias con maiores problemas económicos”.
A concelleira de Servizos Sociais tivo palabras de agradecemento para a institución provincial: “aproveitar para agradecer á Deputación Provincial de Lugo esta achega destas 1.410 máscaras infantís, que se suman ás que xa cederon para os adultos”.
Freire Rancaño contou que “no día de hoxe, venres, os Servizos Sociais do Concello de Ribadeo comezan co reparto das máscaras infantís que foron facilitadas pola Deputación Provincial de Lugo. Este reparto farémolo entre as familias máis vulnerables de Ribadeo que teñan nenos de entre 3 e 16 anos. Aínda que as máscaras só son obrigatorias para maiores de 6 anos, si que é verdade que é recomendable para as crianzas de entre 3 e 5. Así que decidimos tamén incluír este rango de idade no reparto”.
A responsable de Servizos Sociais engadiu que “as máscaras veñen en packs de 10. Neste primeiro reparto queremos chegar a 83 menores pertencentes a 54 unidades familiares”.