A CIG alerta do aumento de derivacións a hospitais privados fóra da Mariña

A Mariña, 1 de outubro, 2026. A CIG-Saúde leva anos alertando de que as listas de espera que publica o SERGAS non se corresponden coa espera real que trasladan os propios pacientes. Segundo o sindicato, a información oficial dista “moito” da experiencia das persoas que agardan por unha intervención ou unha proba diagnóstica.

Así mesmo, a organización sindical denuncia o incremento das derivacións de pacientes da Mariña cara a centros sanitarios privados fóra da comarca, tanto para intervencións cirúrxicas como para probas diagnósticas. A CIG-Saúde considera que desde as direccións dependentes da Consellería de Sanidade se está a normalizar o envío de doentes a hospitais como Polusa e Virxe dos Ollos Grandes, en Lugo, ou ao Ribera Juan Cardona, en Ferrol.

Especialmente grave, sinalan, é a derivación de pacientes para a realización de probas endoscópicas en centros privados alleos á comarca. A CIG-Saúde recolleu testemuños de persoas que tiveron que deter o coche na beiravía “porque literalmente non podían aguantar máis”.

O sindicato atribúe as longas listas de espera ás políticas de recortes do Goberno galego, que —afirma— deterioran o sistema sanitario público e favorecen os intereses da sanidade privada.

A CIG-Saúde critica tamén que a Xunta se escude agora na folga de médicos para xustificar o incremento das listas de espera, derivando responsabilidades cara ao Goberno do Estado, cando —lembra— as competencias en materia sanitaria e, polo tanto, a xestión das listas de espera, son exclusivas da Consellería de Sanidade.

Finalmente, a organización insta ao Goberno galego a apostar decididamente pola sanidade pública, incrementando non só os metros cadrados das infraestruturas, senón tamén os servizos e o número de profesionais de todas as categorías, se realmente existe vontade de rematar coas listas de agarda.