- Este domingo, 21 de Abril, terá lugar unha Marcha cívica pola paz mundial en Ribadeo e tamén para denunciar as atrocidades e asasinatos masivos de poboación civil que o goberno de Israel está a perpetrar na franxa de Gaza contra o pobo palestino
Sairá do Concello ás 12,30 e volverá ao mesmo punto tras un percorrido polas rúas Villafranca del Bierzo, Ramón González, Dr. Moreda, Reinante, Villafranca del Bierzo e remate de novo no concello. A convocatoria ven do colectivo pola paz da Mariña de Lugo e Occidente asturiano que se concentra todos os domingos nas escaleiras do concello para denunciar todas as guerras no mundo, as carreiras armamentísticas, o risco de guerra nuclear e a posta en valor dunha cultura de paz como patrimonio e dereito das persoas. Ao remate lerase un manifesto esixindo o cese do fogo que é común a outras concentracións que se realizarán en todo o estado.
- Ana Pena acaba de cumprir o seu primeiro aniversario como guía turística coa súa empresa Guía tu día, adicada a facer visitas guiadas pola Mariña
Durante todo o ano organiza paseos por diferentes vilas mariñás e abertas a todo o mundo, ainda que tamén traballa con grupos pechados. "Agora comezan a chegar as excursións e grupos organizados e xa teño varios tours programados para os vindeiros meses antes do comezo da tempada estival", comenta. Esta focega agradece a boa acollida das visitas "estou ilusionada, encántame a miña profesión e quero continuar con este proxecto. Agora estou diseñando novas propostas de cara a maio e xuño que pronto anunciarei".
- Brincos de lecer en Cervo
As crianzas desfrutaron dun novo xoves de Brincos de Lecer, na Casa da Cultura.
- A biblioteca do CIFP Porta da Auga, de Ribadeo, acolleu unha charla sobre “Aurora Sampedro, a científica da Mariña, adiantada ao seu tempo”
Foi pronunciada por Manuel Rivero, autor do libro “Universo Aurora Sampedro Piñeiro”, sobre a figura desta científica e investigadora barreirense. A actividade foi organizada pola Comisión de Igualdade do CIFP Porta da Auga. Xunto a Manuel Rivero estivo o alcalde de Ribadeo, Dani Vega.
- Inaugurada "Un día na Rapa das Bestas (Do monte ó curro)" na Casa da Cultura de San Cibrao
Durante o mes de abril teremos a oportunidade de desfrutar dunha impresionante mostra fotógrafica de Sindo Novoa baixo o título "Un día na Rapa das Bestas (Do monte ó curro)" que permitirá coñecer de preto como se vive esta Festa en Sabucedo, a través da óptica deste fotógrafo. Poderase visitar ata o 3 de maio
- A Asociación de Comerciantes Centro Histórico de Viveiro fixo entrega do premio da Campaña do Dia do Pai que consistiu no sorteo dunha “Experiencia en familia”
A gañadora foi Maite Vázquez García, veciña de Viveiro que desfrutará do premio co seu marido e os seus catro fillos, toda unha experiencia en familia. Poderá escoller as datas da viaxe e o destino, o obxectivo é pasalo en grande!. O premio foi entregado esta mañá nas oficinas do CCHV pola Presidenta do colectivo Andrea Porbén, acompañada de Gracia Gonçalves e Belkis Valera membros da Directiva.
- Cervo celebrará a XXXVIII edición do Día do Xubilado o 1 de maio
A alcaldesa, Dolores García Caramés, informou a través dun bando de que xa está aberto o prazo de inscrición para participar neste encontro e a veciñanza ten ata o 26 de abril para anotarse na Casa do Concello, en Cervo, ou na Casa da Cultura, en San Cibrao. Ese mesmo día entregaranse os trofeos do campionato de tute e parchís que se está a xogar estes días na Casa do Mar de San Cibrao, no que participan unha vintena de parellas (12 xogan ao tute e 12 ao parchís).