Burela acollerá do 18 ao 20 de marzo as III Xornadas Gastronómicas do Ourizo

Nota de prensa

BURELA ACOLLERÁ DO 18 AO 20 DE MARZO AS III XORNADAS GASTRONÓMICAS DO OURIZO, QUE ORGANIZA A CONCELLARÍA DO MAR.

Burela, 11 de marzo de 2011. Burela acollerá do 18 ao 20 de marzo as III Xornadas Gastronómicas do Ourizo, que organiza a Concellaría do Mar. Na cita participarán vinte establecementos hostaleiros.

A edil socialista, Remedios López Villar, manifestou que “coma sempre ofrecerase un tapeo polo pobo, o prezo do ourizo cocido ou cru será de 4 euros a tapa. O resto das degustacións que elabore cada restaurante será ao prezo que poña o seu propietario, segundo valore o traballo empregado para a súa elaboración”. A concelleira do Mar lembra que “nas anteriores edicións púidose degustar de diferentes tipos de formas coma en paté, en croquetas, en empanada, con fabas, en revolto, en arroz, en pementos de piquiño, en filloas…”.

As Xornadas Gastronómicas do Ourizo de Burela serán no mes de marzo, os días 18, 19 e 20 “facéndoas coincidir coa ponte de San Xosé, igual que o ano pasado. Quere dicir tamén que nos puxémonos en contacto co concelleiro de Turismo do concello de Cervo, para que non coincidirmos nas fechas e quitarnos protagonismo uns aos outros”, seguiu a relatar Remedios López.

A concelleira do Mar engadiu que “nesta ocasión en Burela sortearase unha estancia dun fin de semana nun balneario para dúas persoas entre todos os comensales que degusten o ourizo nesta nova cita gastronómica”.

Os locais participantes son: Mesón do Poeta, Palacio de Cristal, Mesón Carlos, Mesón Hamilton, Os Remos, Parrillada A Marquesa, Sargo, Trisquel, Pena Orxal, La Bodeguilla, Parrillada de Jandro, A Fazenda, Cervexería Kiko, Casa Miranda-Porto de Burela, Hotel Nordés, O Portelo, Bar da Costa, Churrasquería Abrente, Mesón da Pedra e La Sartén de Carmen.

Remedios López Villar convida “a todo o mundo a que se aproxime a Burela a degustar este magnífico equinodermo, xa que estamos na tempada na que se consume”.