O Observatorio fai balance das actividades desenvoltas e presenta a nova programación

Nota de prensa

Despois de tres anos de andaina feminista na Mariña, o Observatorio fai balance das actividades desenvoltas e presenta a nova programación

Iniciamos o ano despedíndonos da exposición “Feminismo Galego” que trouxemos para a Mariña, relevante para á sociedade por explicar os xermolos do feminismo como movemento que aspira a transformar a sociedade actual nunha igualitaria e para nós como organización feminista que debe coñecer a historia. Tamén presentamos e puxemos a venda a I Axenda Feminista, resultando ser máis atractiva do que pronosticaramos.

Este ano caracterizouse por poñer en marcha unha serie de iniciativas novidosas para a comarca como foi o I Ciclo de cinema erótico na Mariña, o I debate en período electoral de Igualdade e Mocidade e o I Concerto de Músicas e Letras en feminino co obxeto de promover a creación artística das mulleres da Mariña, tanto das que se achegan ás diferentes artes dunha forma amateur, de desenvolvemento persoal, como daquelas que desenvolven proxectos artísticos profesionais.

Tamén levamos a cabo a publicación do libro “Actitudes de xénero no profesorado e alumnado de secundaria da Mariña. Claves para unha escola coeducativa”, idea que xurde a raíz do noso primeiro traballo de investigación realizado ao longo do ano 2010.

A nosa participación en foros, xornadas, etc. foi moi activa nestes meses. O Observatorio foi requirido tanto para impartir unha conferencia para profesorado do IES de Foz sobre Xénero e Lingua, como para participar nas Xornadas de Violencia de Xénero dos Concellos de Ares e de Ribadeo. Tamén contouse coa presenza do Observatorio nunha das mesas que conformaron o I Encontro de Consellos Municipais da Muller, desenvolto na cidade olívica.

E nestes meses denunciamos as situacións que frean a conquista da sociedade igualitaria e sen discriminacións. Así foi coa imposibilidade de poder practicar a interrupción voluntaria do embarazo no Hospital da Costa, coa aprobación da Lei de familia por parte da Xunta de Galicia, coa infrarepresentación feminina nas listas electorais dos últimos comicios, e coa colaboración da USC nun curso de verán que versa sobre o SAP.

Toda o traballo do Observatorio, desde as actividades que realizamos polas diferentes vilas da Mariña, as denuncias, as campañas, etc. pode consultarse na páxina web www.observatorioigualdade.org ou no facebook.

Ao longo dos vindeiros meses iremos difundindo novas actividades, como O outono feminista e o novo proxecto educativo que queremos implantar nos centros educativos, “Facendo un xogo coeducativo: o trivial feminista”. Seguiremos tamén dando continuidade a aquelas actividades que consideramos que deben manterse no tempo, como o ciclo de charlas-café, III Videoforum “Mulleres no Mundo”, …..

O OMI seguirá a ter presenza e a demandar a igualdade de xénero na Mariña. Por iso, seguiremos activas e emprederemos a finais de ano unha orixinal campaña de achegamento de voluntarias á entidade. E a nova axenda feminista para o ano 2012 vai traer sorpresas.