Nota de prensa:
Ampla aportación do BNG de Xove ao PXOM que se aproba hoxe en sesión plenaria
O Bloque Nacionalista Galego foi unha das formacións políticas máis activas e colaboradoras na tramitación do Plan Xeral de Ordenación Municipal. Algunhas das máis importantes alegacións do BNG ao PXOM versaron sobre:
-A revisión do aliñamento do núcleo urbano de Xove (dado que os límites marcados inicialmente polo Plan Xeral estabelecían recortes incomprensíbeis e anulaban zonas nas que existían pequenas edificacións).
-A ampliación dos núcleos tradicionais de Portocelo e Canelas (nos que se excluían vivendas con máis de 50 anos).
-A reserva de zonas de ampliación de núcleo (co obxectivo de incluír na ordenación as vivendas que se ían construír, tendo en conta as licenzas concedidas).
-A revisión e actualización do catastro do Concello de Xove, dados os numerosos erros advertidos en canto á existencia das distintas leiras (deficiencias referidas a superficie, parcelamento e segregación)
-A inclusión do Castro da Rigueira, da Igrexa de Monte ou da Igrexa de Portocelo nas Áreas de Interese Arqueolóxico.
-A sinalización de forma clara dos puntos de vertido existentes e a previsión dos que se prevén de cara ao futuro.
-A protección das marxes do actual Sistema Xeral Ferroviario (co fin de que no futuro poidan acometerse as obras de ampliación e mellora da rede ferroviaria, así como unha hipotética parada para usos industriais e da poboación no Polígono Industrial de Camba).
-A previsión no plano xeral da posible mellora das estradas interiores do Concello de Xove.
-A correcta delimitación dos límites xeográficos entre os concellos de Xove e Viveiro (en concreto o núcleo de Reboredo presentaba dúas liñas de deslinde entre a estrada do Cruceiro a Area e Castelo, o que supoñía unha dúbida e unha inquedanza para os propietarios das fincas por non saber a que termo municipal pertencía a súa propiedade).