O Concello de Cervo abre o prazo de solicitude de permiso para as fogueiras de San Xoán

O Concello abre o prazo de solicitude de permiso para as fogueiras de San Xoán

-A veciñanza dispón ata o 21 de xuño para presentar a petición nas dependencias do Concello

-A Delegación de Seguridade pide precaución e responsabilidade, especialmente no acendido, queima e apagado da cacharela

Cervo, 17 de xuño de 2012-O Concello de Cervo, a través da Delegación de Seguridade, anuncia a apertura do prazo para solicitar permiso para realizar fogueiras na noite de San Xoán. Un trámite que resulta imprescindible para poder acender unha cacharela nesa data festiva. Para iso, aquelas persoas que teñan previsto facer unha fogueira deberán presentar a solicitude indicando coa máxima exactitude posible o lugar onde realizarán a cacheira e achegando o nome do solicitante, que deberá ser maior de idade, e un teléfono de contacto. En todo caso, só será precisa unha solicitude por fogueira, que deberá entregarse nas dependencias do Concello antes das 15:00 horas do 21 de xuño.

O obxectivo de ter un control do número de cacharelas que se acenden na noite de San Xoán é poder poñer en marcha medidas de prevención para evitar posibles incidencias, coa activación dun dispositivo de seguridade composto por voluntarios de Protección Civil, tal e como se vén facendo nos últimos anos.

Ao mesmo tempo, dende a Concellería de Seguridade solicitan á poboación que “dispoña todas as precaucións necesarias para que a noite de San Xoán sexa lembrada unicamente como unha noite de festa” explica o seu responsable, José Ramón Soto. Ao mesmo tempo, o edil pide que se eviten as actitudes temerarias ao redor da fogueira, que non se boten nela elementos contaminantes ou altamente inflamables e que se teña especial coidado no control do lume.