O PSdeG preguntará na comisión da CRTVG pola “censura” da manifestación a prol da área sanitaria en Monforte

A deputada Concepción Burgo lamenta que este caso “é unha mostra máis da manipulación informativa desde a chegada ao poder de Feijóo, que non ten outro fin que ocultarlle á cidadanía as críticas ao seu goberno e os incumprimentos dos seus compromisos, que teñen graves consecuencias sobre aspectos de máxima importancia como é, neste caso, a saúde da poboación”.

Os deputados do PSdeG-PSOE veñen de rexistrar dúas preguntas para a súa resposta oral e por escrito na comisión da CRTVG sobre a “censura” informativa da masiva manifestación organizada pola plataforma en Defensa da Sanidade Pública en Monforte o pasado sábado 16 de marzo, na que se esixía a paralización do decreto de creación dunha área sanitaria única na provincia de Lugo e a autonomía e mantemento do Hospital comarcal.

A deputada Concepción Burgo, presente na mobilización xunto con outros representantes socialistas, destaca que esta manifestación congregou en Monforte –vila que ten uns 15.000 habitantes- “a 9.000 persoas, contando co apoio de toda a hostalería e comercio, que pechou varias horas ese día, e de numerosas asociacións cidadás, partidos e sindicatos”. A noticia, lembra Burgo, “foi reflectida por toda a prensa galega cunha ampla cobertura, con medios e televisión de ámbito galego e tamén estatal, o que dá idea da súa importancia”.

“En cambio, e significativamente, a TVG, medio de comunicación público, non estaba cubrindo esta noticia e nos Telexornais de mediodía e do serán non se dixo nin unha palabra sobre o acontecido”, lamenta a socialista, que indica que “non é a primeira vez que se dan este tipo de situacións”, que xa sucedera tamén na multitudinaria manifestación desenvolvida en Monforte polo mesmo motivo en 2010. “É unha mostra máis da censura que leva poñendo en marcha a directiva da TVG dende a chegada ao poder do presidente Feijóo, e da manipulación informativa sistemática que se realiza nos informativos da Televisión de Galicia”, afirma a deputada, que recorda que esta manipulación “chega a uns niveis tan elevados que incluso foi denunciada polo Comité de Empresa da Compañía”.

O grupo parlamentario socialista considera “imprescindible que a dirección da CRTVG dea explicacións de esta nova manipulación, que non ten outro fin que ocultarlle á cidadanía galega as críticas que se están a facer a política do goberno do señor Feijóo e aos incumprimentos dos seus compromisos, que teñen graves consecuencias sobre aspectos da máxima importancia como é, neste caso, a saúde da poboación”. Por todo isto, Concepción Burgo esixirá unha explicaión sobre “as causas que motivaron este silencio informativo” do acto de Monforte. “Considera o Director Xeral da CRTVG que unha manifestación que congrega a 9.000 persoas e que consegue o peche de todo o comercio e hostalería de Monforte de Lemos, ademais do apoio de asociacións de veciños de toda a provincia de Lugo, de sindicatos e partidos políticos non ten a suficiente relevancia para ser noticia na Televisión de Galicia?”, pregunta a deputada, que quere saber se o Director Xeral da CRTVG “considera que é o seu deber censurar as noticias que reflicten as reivindicacións da cidadanía galega cando critican ao actual goberno”.