O alcalde censura que o BNG de Xove non se interesara por Alcoa e que algúns dos seus integrantes se beneficien dos servizos do Concello pese a no ser residentes

Respecto ás declaracións do portavoz do BNG en Xove, Marco López, debo dicir que sí é certo que mostrei o meu apoio incondicional ós traballadores de Alcoa en todo momento, incluíndo tamén a súa reclamación o 27 de setembro en Santiago.

Pero tamén é certo que ese mesmo día acudín a Santiago no meu vehículo particular, como Alcalde de Xove, bastante antes da hora da manifestación, realizando xestións ante a Consellería de Industria, como fixen noutros moitos momentos da difícil situación pola que pasou Alcoa. Estas xestións tiveron como resultado unha audiencia do Conselleiro cos representantes dos traballadores á que eu tamén asistín como se pode comprobar pois foi recollida por tódolos medios de comunicación.

Polo tanto, debo dicirlle ó Sr. López que non acudín a Santiago exclusivamente a unha manifestación, como el supón, pois en contra do que pensa el e o BNG, de que todo se soluciona con berros, insultos e axitando bandeiras, outros pensamos que é máis útil a xestión, o traballo e o diálogo.

Este traballo, realizado por moita xente, entre os que me inclúo, reflectiuse na consecución dun contrato eléctrico axeitado para Alcoa, e no medio quedaron moitas reunións, moitas visitas á fábrica e horas de traballo, incluídos fins de semana e viaxes na comarca no meu coche particular polos que nunca cobrei un só euro. E estou orgulloso de telo feito así, entre outras cousas porque Alcoa é imprescindible para o Concello de Xove, ó que teño a honra de representar e constitúe o sustento para moitos dos meus veciños.

Durante todo o proceso, sen embargo, non deixa de ser chamativo que ninguén do BNG de Xove se preocupara por Alcoa, que non houbera nin unha soa pregunta acerca da situación, e que só se vira a varios do membros do BNG xovense na manifestación de Viveiro de apoio á fábrica axitando bandeiras e proferindo insultos contra o PP.

Agora, á vista das declaracións de Marco López, queda claro que o interese do BNG nunca foi Alcoa, senón prexudicar ó PP para sacar réditos políticos.

Por certo, os 92 euros cobrados en dietas, cantidade que está regulada por lei, é menos do que cobran os dous concelleiros do BNG por acudir a cada pleno do Concello, gasto que por certo non ten ningunha rendibilidade para Xove, xa que tras dous anos de lexislatura aínda non presentaron ningunha iniciativa relacionada co municipio.

E xa para rematar, e con respecto a Marco López, o único que se sabe del en Xove e que paga os seus impostos noutro concello e que acude a Xove só a beneficiarse dos servizos que pagamos todos os xovenses, e un claro exemplo sería o uso que está a facer dende hai preto de dous anos da escola infantil municipal, pese a residir en Viveiro, e que se mantén, ademais das cotas dos usuarios, cos impostos dos veciños de Xove, pois como el ben sabe, é claramente deficitaria.

Polo tanto, nin el, ni algún compañeiro do seu partido que tampouco reside en Xove, son as persoas máis indicadas para falar de “ética”.

Demetrio Salgueiro
Alcalde de Xove