Os cadetes do CD Foz, clasificados para xogar a fase de ascenso

Unha victoria e unha derrota, colleita dos equipos base do C.D.Foz que xogaron esta fin de semana.

Así os infantís de Burunda, volveron a perder, esta vez en Santiago ante o titular por un apretado 3-2, e seguen sen saber o que é gañar nesta segunda volta. Só cinco puntos o separan da Milagrosa, equipo que marca o descenso. Se non cambian os resultados, veranse apurados ó remate da tempada para non perder a categoría. O club confía no seu plantel e no seu míster para acadar a ansiada permanencia. Fran e José Miguel foron os autores dos goles focegos.

Pola súa parte, os cadetes desprazáronse a Lugo para xogar contra a Ferroviaria onde gañaron por 2-6. Con este resultado, unido á derrota do Ribadeo, terceiro clasificado, o equipo de Oke consegue a clasificación matemática para xogar a fase de ascenso á Liga Galega. O plantel xa pode ir pensando na preparación da sempre tan difícil e complicada fase de ascenso. O titulo terá que esperar un par de xornadas, xa que a diferencia co segundo é de cinco puntos. Gonzalo, Germán e Dani foron os goleadores, todos por partida dobre.