O Valadouro, 23 de xullo de 2013.- De novo a terraza da cafetería que rexenta a tenente de alcalde do Valadouro, María José Fernandez, volve a ser actualidade xa que lonxe de corrixir as deficiencias denunciadas polo Grupo Municipal Popular acumula novas irregularidades, neste caso, coa complicidade do Concello, que parece non querer ver o que está acontecendo.
Os populares denunciaron hoxe que para instalar a tarima obrigatoria coa que, segundo a ordenanza municipal debe contar esta terraza, María José Fernández decidiu suprimir un paso rebaixado de minusválidos, realizando a obra de taponamento correspondente, e inhabilitou parte dun paso de peóns, cuxa sinalización no chan foi parcialmente borrada.
Parece ser que a tenente de alcalde do Valadouro pensa que a rúa é súa e que pode facer e desfacer ao seu antollo, pero o que é máis grave, decide facelo alterando beirarrúas e os pasos de peóns e accesos rebaixados para discapacitados.
O Partido Popular considera que a tenente de alcalde do Valadouro está a recibir un trato de favor polo Concello, xa que dubidan que un comportamento similar puidera permitirse a calquera outro propietario dunha cafetería ou veciño, que con toda seguridade recibiría a sanción correspondente. Dáse a circunstancia ademais de que UDIVAL, o partido político que preside María José Fernández, xestiona a área de Obras do Concello. Desde o PP finalmente din que calquera veciño pode comprobar que as denuncias que están realizando son reais pasando por alí e comprobado as obras realizadas in situ.