O presidente da FEGAMP asegura que o Consello de Estado lle da a razón nas súas alegacións á reforma local

SANTIAGO. O presidente da Fegamp e alcalde de Ferrol, José Manuel Rey Varela, valorou hoxe que, á vista do que se vai coñecendo do informe elaborado polo Consello de Estado sobre o anteproxecto de reforma local que pretende o Goberno, “dáselle a razón á Fegamp nas alegacións que expomos no seu día” e das que se deu traslado ao Ministerio de Facenda e á FEMP.

Para Rey Varela, o informe do órgano constitucional “apoia a postura da Federación”, que mantivo unha visión crítica a un anteproxecto “necesario para actualizar a administración local pero equivocado no seu contido”.

“O Consello de Estado dános a razón, o que nos reafirma nas reivindicacións que viñemos facendo como voz única do municipalismo galego”, apuntou. O informe do órgano consultivo alerta contra o baleirado competencial dos concellos e da inconsistencia do custo estándar como baremo para valorar os servizos, “dúas alegacións que a Fegamp manifestou desde o primeiro minuto”.

Nesta liña, Rey Varela amosou a súa satisfacción por que se recoñeza “que o custo estándar, tal e como está reflectido no anteproxecto, non ten en conta as singularidades do municipalismo español, non atende a unha realidade como Galicia no que a dispersión ou o envellecemento son unha variable fundamental para o custo dos servizos públicos”.

Tamén no plano competencial, o informe advirte contra o sobredimensionamento das deputacións provinciais, que poderían asumir masivamente servizos transferidos desde os concellos de menos de 20.000 habitantes, sen atender á súa situación económica. “Sempre mantivemos que ese non debía ser o papel das deputacións”, explicou Rey Varela, “senón que o importante era definir a súa función de apoio e asistencia aos concellos máis pequenos, promovendo actuacións no ámbito supramunicipal”.

Outro dos apartados que reforza a postura da Federación “son as dúbidas que ao Consello de Estado lle xeran os aforros que o Goberno pretende conseguir con esta reforma”. “Sempre dixemos que os concellos non eran o problema do déficit en España, e por tanto, non somos a administración á que pedir contas por este grave problema”, comentou Rey Varela, “ao contrario, somos a única que está a reducir o seu déficit e xerando superávit neste arranque de 2013, como recoñeceu o propio Ministerio de Facenda”.

Novo escenario
Segundo José Manuel Rey Varela, “este informe debe facer reflexionar ao Ministerio de Facenda”. “Ábrese un novo escenario para reabrir a negociación coas federacións de municipios e as autonomías”, apostou, “porque esta reforma debe ser froito dun gran consenso para que non se converta nunha oportunidade perdida”. “Espero que o Goberno atenda a mensaxe clara que lle transmite o Consello de Estado e recapacite”, apostilou.

“A Fegamp segue crendo firmemente que é necesaria unha reforma, un financiamento local novo e máis xusto, unha delimitación competencial seria e rigorosa”, detallou o tamén alcalde de Ferrol, “pero que non se faga ás costas dos concellos, porque ao final, o gran prexudicado é o cidadán”.

A Fegamp “vai manter a súa mensaxe, o seu discurso reivindicativo, porque a nosa folla de ruta son as alegacións que aprobou a Comisión Executiva no mes de marzo e que representan o sentir dos 314 alcaldes e alcaldesas de Galicia”. “A elas seguirémonos cinguindo, defendendo entre outras reivindicacións o mantemento dos servizos sociais na administración local e opóndonos ao baleirado competencial dos concellos”, finalizou Rey Varela.