Os socialistas de Burela acusa ao PP de enganar ós veciños con respecto á obra de acceso ó porto

Dende a Comisión Executiva do PSdG-PSOE de Burela, temos que denunciar a teima dos Partido Popular de Burela e máis do equipo de “desgoberno” en enganar, terxiversar e mentir con respecto á obra de acceso ó porto de Burela.

Dicimos isto porque o tempo e os feitos poñen a cada un no seu sitio, e non podemos admitir as declaracións e mentiras que o Partido Popular está a verter sobre este asunto. A realidade e os feitos son os que son, e estes demostran que a obra de acceso ó porto foi impulsada e iniciada polo goberno do Sr. Alfredo Llano e o goberno da Xunta do Sr. Touriño no ano 2007, concretamente en novembro de 2007 se inician as obras, ese é un feito máis que constatable. Despois disto e a raíz dunha denuncia xudicial dun veciño afectado polas expropiacións, e dun problema técnico por culpa da fraxilidade do terreo estas obras tiveron que ser paradas á espera da elaboración dun novo proxecto que subsanara estes problemas, pero os cartos para acometer a obra estaban enriba da mesa e así foi publicado no DOG en xaneiro de 2007 cun montante de 5.831.163 euros. O 22 de novembro a daquela Conselleira de Política Territorial, Obras Públicas e Transportes viña a Burela a ver as obras que xa estaban en marcha e poñía de manifesto a aposta do goberno presidido por Emilio Pérez Touriño por esta obra, e por Burela.

Foi coa entrada no goberno do Partido Popular do Sr. Feijóo cando se retirou a partida presupostaria para esta obra, parando definitivamente esta obra na que se foron colocando partidas ínfimas nos presupostos da Xunta do Partido Popular que nunca se chegaron a executar, sen ir máis lonxe para este ano 2013 había sobre 250.000 euros que nada se sabe deles. Calquera que queira comprobar o que aquí dicimos non ten máis que tirar de hemeroteca, presupostos da Xunta e comprobalo.

Dende o PSdG-PSOE de Burela queremos que o anuncio feito polo Conselleiro Agustín Hernández sexa unha realidade, e estariamos encantados de que isto fose así, e este proxecto se faga por fin realidade. O Partido Popular do Sr. Feijóo ten a obriga moral de devolver ós veciños e veciñas de Burela o que xa era seu e que lles quitaron, pero ¿como non imos a ter dúbidas dun goberno do Partido Popular que prometeu ata en sete ocasións a ampliación do Hospital ou unha nova gardería para Burela e non cumpriron absolutamente con nada?. Esperemos que non sexa outro dos anuncios propagandísticos do Partido Popular sen ningún tipo de contido e se lle de un impulso definitivo a este proxecto que consideramos de suma importancia para o pobo de Burela.