Alfonso Puente considera que o BNG non é quen de falar de mala xestión no Concello barreirense “cando eles na Deputación perderon un millón de euros co Breogán e non foron capaces de reter os fondos do Museo Provincial”

Barreiros, 30 de setembro de 2013. O alcalde, Alfonso Fuente, no pleno celebrado este luns no Concello asegurou que o despido de dous traballadores foi motivado polo plan de axuste de pago a provedores. O rexedor explicou que obedeceu a causas económicas: “non hai máis razóns” e dixo que “percibiron 45 días de indemnización por ano traballado, en lugar de 20 días”. Así se refería no pleno celebrado esta tarde ás acusacións efectuadas desde o BNG: “cando unha institución non pode garantir o pago dos salarios aos traballadores ten que tomar decisións que son necesarias”. Sobre a demanda do BNG de que debería ser a xunta de goberno a que afrontase as indemnizacións a eses traballadores Alfonso Fuente manifestou que “dita petición está fora de contexto. Estamos diante dun caso máis da demagoxia á que nos ten acostumados o Bloque Nacionalista Galego. Esa demagoxia chega a tal extremo que foi a propia Deputación de Lugo a que levou o proceso xudicial deses despidos e son eles mesmos os que se sorprenden”.

O rexedor barreirense considera que “o BNG non é quen de falar de mala xestión no Concello de Barreiros, e non poden facelo porque foron capaces de perder un millón de euros co Breogán na Deputación de Lugo, non foron capaces de reter os fondos do Museo Provincial e agora van pagar uns tres millóns de euros por ditos fondos. A xestión do BNG na Deputación Provincial deixa moito que desexar. Por non falar do caso dos asesores”. A Fuente Parga non lle estraña que “sexa Ana Ermida a que realice este tipo de acusacións, porque a Antonio Veiga fáltalle coraxe para falar de todo isto. Non BNG non están capacitados para falar de xestión económica algunha”.

No pleno celebrada esta tarde tamén se falou da ordenanza reguladora das praias que “non se aprobou antes porque estivo en período de exposición pública e desde o BNG aproveitaron para presentar alegacións. Non entrou en vigor este verán, pero farao ao longo dos vindeiros meses”.

Alfonso Fuente referiuse a un presunto delito cun empadroamento denunciado nas últimas semanas polo BNG. Ao alcalde parécelle “preocupante que o BNG non teña coñecemento de cómo funciona unha administración. Ana Ermida ten disculpa neste caso, pero Antonio Veiga non. Nin os empadroamentos nin baixas no padrón dependen da Alcaldía. Nas últimas semanas escoitamos un montón de mentiras pronunciadas polos nacionalistas que non se corresponden para nada coa realidade, xa que esas altas e baixas no padrón dependen directamente da secretaria do Concello”. Fuente Parga subliñou que “esa señora da que o BNG fala non chegou a exercer o seu dereito a votar. Outro caso máis de demagoxia e que nos indica a baixeza política destes señores do Bloque Nacionalista Galego, que deberían saber que o Instituto Nacional de Estadística realiza de xeito habitual comprobacións dos procesos realizados no padrón: baixas e altas. Puidera ser que alguén empadroase a outra persoa na súa casa por facerlle un favor e sen ningunha mala intención ou puidera ser que alguén falsificase unha firma doutra persoa, pero será a xustiza a que se pronuncie neste caso, como non podería ser doutra maneira”.