O BNG acusa a Alfonso Puente de “ocultar os contratos de traballo realizados no Concello de Barreiros”

Barreiros, 7 de decembro de 2013. O BNG de Barreiros requiriu no pleno do pasado 25 de novembro información referida ás contratacións realizadas no concello de Barreiros ao abeiro dos plans de cooperación da Xunta de Galiza. Os nacionalistas pretendían saber cantas persoas, das tres que segundo as bases lle correspondía contratar ao concello barreirense, se contrataron e que postos se cubriron.

Neste sentido, os nacionalistas solicitaron tamén acceso aos expedientes de contratación ao fin de comprobar cal foi o proceso de selección de persoal e os criterios seguidos.

Segundo puido saber o BNG “non houbo ningún tipo de publicidade destes procesos e non existiron bases para cobertura das prazas, realizándose a selección a raíz dunha única entrevista persoal.”

Pero ademais, o BNG tivo coñecemento de que as dúas persoas contratadas son persoas de fóra do concello e que, incluso, se deixou unhas das tres prazas que lle correspondían a Barreiros sen cubrir, podendo ser cuberta por veciñas ou veciños.

Neste sentido, o grupo municipal do BNG interesouse por este tema no último pleno sen obter ningunha resposta por parte do Alcalde popular, Alfonso Fuente. Nese mesmo pleno, e á vista da actitude do rexidor, solicitaron o acceso aos expedientes para poder comprobar estas cuestións, sen que ata o día de hoxe foran postos á súa disposición.

Para o BNG de Barreiros, “Alfonso Fuente pretende ocultar as súas contratacións á fronte do concello, xa que demostran a súa falta de preocupación polas veciñas e veciños en situación de desemprego e a utilización das mesmas ao seu antollo.”
“Se é certo que o alcalde de Barreiros non contratou ningunha persoa de Barreiros tendo na súa man dar traballo a algunha das 198 persoas que no mes de outubro figuraban como desempregadas neste concello debe, ademais de calar, pedir disculpas a toda esa xente coa que está xogando e da que pretende facerse pasar polo seu defensor.”

“Xa sabemos como se preocupa o PP das persoas paradas de Barreiros”, aseguran desde o BNG. “Preocúpase en época eleitoral de venderlles o favor a cambio de votos ou de afiliacións ao PP ou ás súas xuventudes.”

“Pedímoslle ao Alcalde de Barreiros que aclare as contratacións e os criterios das mesmas neste concello e que deixe de facer de mal actor no espectáculo que ten posto en marcha o PP de Lugo para tapar a súa inutilidade á fronte da Xunta de Galiza para acabar coa sangría do desemprego,” conclúen os nacionalistas.