Os socialistas aseguran que o informe da Xunta sobre a mina de caolín sí considera os perigos para traballadores e veciños da parroquia

CERVO, 13 DE FEBREIRO. Os socialistas de Cervo non dan crédito á pésima actitude do alcalde, Alfonso Villares, ante o serio perigo que ocasiona a greta detectada na mina de caolín situada na parroquia de San Román de Vilaestrofe, “compartimos a preocupación dos veciños e pedimos ó noso rexedor que esixa con urxencia a quen teña competencias no asunto que se poña solución inmediata e a longo prazo”.

“É unha auténtica vergonza que o señor Villares recoñeza o seu descoñecemento do problema”, dende o PSOE de Cervo subliñan que, “é moi certa a información facilitada polos veciños, xa que no rexistro de entrada poidemos corroborar o informe da Xunta con data do mes de novembro, de feito o Concello ten información sobre o tema dende o ano 2012. As palabras do señor Villares amosan a falta total de preocupación polos asuntos que suceden no seu concello ou ben, o seu desinterese por solventar e defender os intereses dos veciños”.

Ademais da ignorancia amosada con este problema, “o noso alcalde minte ós veciños ó asegurar que o deslizamento de terreo detectado non supón ningún risco máis que para os traballadores da propia mina. Aconsellámoslle que lea con calma e interese o informe da Xunta, ten en consideración o perigo para seguridade dos traballadores, para os usuarios das pistas e para os propios veciños da parroquia”.

Dende o PSOE de Cervo lémbranlle a Villares que “estamos a falar dun problema serio, que mantén ós veciños en alerta, e para o que necesitamos unha solución inmediata e duradeira. A opción de mirar para outro lado e esperar a que realmente suceda unha desgracia non é a máis acertada, como alcalde de Cervo ten a obligación de facer as xestións oportunas para axilizar os trámites e non esperar a que outros, dende Santiago, se decidan a tomar medidas”.