González Santín: “con José Blanco, Europa recuperará o seu rumbo”

LUGO, 17 DE MARZO.- O secretario provincial –Juan Carlos González Santín- presidiu este luns a reunión da executiva do PSdeG-PSOE, e na que os socialistas analizaron o reto que supoñen para o Partido as vindeiras eleccións europeas coa inclusión nas listas do ex Ministro de Fomento José Blanco. Neste senso, González Santín subliñou que “xa lle trasladamos a nosa felicitación ao noso compañeiro, pois cremos que se trata dun excelente candidato”. Deste xeito, indicou: “estamos seguros que conseguirá poñer a Galicia e a Lugo no mapa europeo, ao igual que fixo cando dirixiu o Ministerio de Fomento, converténdose no Ministro que máis investiu en Lugo de toda a historia”.

E é que, durante os sete anos de Goberno do PSOE, Fomento executou investimentos na provincia por valor de 1.020 millóns de euros, un 30% máis con respecto ao anterior período do Goberno do PP (788 millóns). Este esforzo inversor situou a Lugo como a provincia galega con máis quilómetros de autovía libre de peaxe 8182), e unha das primeiras de España na que máis se investiu en materia de infraestruturas.

Neste senso, os socialistas destacaron que “con Blanco, Europa recuperará o seu rumbo”. Non obstante, tamén valoraron o traballo desenvolvido polo seu antecesor Antolín Sánchez Presedo; “un home que desempeñou un excelente labor na Eurocámara ao longo destes dez anos. Un exemplo desta extraordinaria tarefa son as negociacións levada as cabo para que as reformas da Política Agraria Común e da Política Pesqueira Común, non fosen tan traumáticas para o sector primario”.

Un lucense nas europeas
Asimesmo, os socialistas congratuláronse de que o feito de que un lucense forme parte das listas ás eleccións europeas, reforzará “sen dúbida o proxecto socialista iniciado en Galicia con José Ramón Gómez Besteiro como líder”.