O BNG de Xove esixiulle ao PP o cumprimento dos acordos plenarios

Desde o Grupo Municipal Nacionalista presentamos no Rexistro do Concello un rogo para a súa toma en consideración polo equipo de goberno local.
Este rogo presentouse porque hai catro anos que se aprobou por unanimidade unha moción do noso grupo coa que se pretendía poñer fin á pegada indiscriminada de carteis en cada proceso electoral pola mala imaxe que se daba de Xove. Esta decisión unánime foi respectada por todas as formacións políticas con representación institucional no noso municipio, agás nas eleccións municipais que tiveron lugar o pasado mes de maio, nas que desde o PP foron incapaces de cumprir as normas aprobadas por eles mesmos.

A consecuencia deste feito é que unha medida exemplarizante coma esta vén de ser eliminada unilateralmente polos populares á primeira de cambio. Por esta razón, facémonos dúas preguntas:
• Este é o mellor exemplo que deben dar as institucións públicas á cidadanía?
• De que maneira pode unha administración esixirlle o cumprimento das normas aos veciños se o Goberno local despreza os seus propios regulamentos municipais?

A actitude amosada polos populares é unha irresponsabilidade que provoca que os carteis electorais se manteñan varios meses, e incluso anos, pegados polos muros e valados. Asemade, esta conduta responde a un modelo obsoleto de ausencia de compromiso cos valores medioambientais e estéticos que non debe ter cabida no noso municipio.

Por todo isto, vémonos na obriga de solicitarmos novamente no pleno que o PP de Xove acate o acordo recollido na acta do día 17/10/2011 colocando a propaganda electoral nos lugares debidamente indicados e sinalizados polo Goberno local, co obxectivo de dar unha imaxe moderna e civilizada para facermos de Xove un municipio atractivo e coidadoso coa súa contorna.