O Eido Dourado despide a súa novena tempada este domingo, 27 de agosto. O ciclo musical Sons no Solpor e os laboratorios creativos para nen@s tiveron un gran éxito de público

Barreiros, 24 de agosto de 2017. O Eido Dourado pechará as súas portas este verán o vindeiro domingo, 27 de agosto. O artista barreirense Celso Dourado fai unha valoración moi positiva desta tempada na que promoveu unha ducia de concertos tanto nos xardíns do Eido como no cámping Gaivota. Celso Dourado anuncia que cara a vindeira tempada posiblemente se limitará o acceso aos concertos a 150 persoas para que todas poidan gozar comodamente destas citas ao solpor.
Celso Dourado anunciou que “o vindeiro domingo, día 27, pechamos a novena tempada do Eido Dourado. Acostumamos a pechala cara a finais de agosto, pero este ano por circunstancias de calendario decidimos adiantalo ao vindeiro domingo”.
Dourado relatou que “este verán desenroláronse cun grande éxito os laboratorios creativos, que están conducidos pola artista e profesora Lucía Vila. Tivemos que reducir o número de rapaces que querían asistir porque era imposible atender a todos en debidas condicións. Podemos dicir que realmente foi un grande éxito, unha aposta firme polo que pode ser o arte vinculado aos máis nenos e por suposto fixémolo sempre dunha forma gratuíta e altruísta”.
O artista barreirense subliñou que “o ciclo musical Sons no solpor xa se está consolidando. Dende o Eido Dourado promovemos este verán ao menos doce concertos, seis no cámping e outros seis no Eido Dourado. Imos tomar algunha medida xa que nos está sobrepasando o número de asistentes. Houbo concertos que practicamente non collíamos e entón cara a vindeiras tempadas imos limitar o acceso a unhas 150 persoas. Este ciclo é unha aposta firme. Sempre procuramos traer aqueles proxectos que están saíndo ao longo do ano e que ao meu entender son innovadores dentro da música no noso país”.
Celso Dourado lembrou que “este ano presentamos por vez primeira na Mariña a Gelría, un grupo cun grande éxito tanto en Inglaterra como en Holanda e composto por galegos e unha catalá. Tamén presentamos a Xógara, o novo proxecto dun focense que vive en Oxford e tres ingleses, e foi unha marabilla porque foi unha fusión de ritmos anglo galegos que realmente resultou moi agradable. E tamén trouxemos a última proposta de Mónica de Nut, para min a cantante máis vangardista que temos nestes momentos no noso país”.
Dourado síntese “moi ledo de aguantar firmemente esta bandeira de promover eventos con escasos recursos e a maior dignidade posible. Quedan estes días para ver a exposición que todos os anos é renovada na súa maior parte e cara ao vindeiro ano seguiremos renovando nela. O Eido Dourado non pode ser un espazo simplemente cara ao público sen ningún tipo de actividade. Ten que estar cheo de actividades e os laboratorios foron unha labor importante sobre todo por parte de Lucía Vila e as súas dotes como ensinante”.
O artista barreirense dixo que “o ciclo musical Sons no solpor para min supón un verdadeiro esforzo. Quero agradecerlle aos músicos e aos artistas o seu comportamento cara a min e cara a este espazo. Sempre marchan moi ledos porque segundo eles é un espazo máxico onde poucas veces presentan os seus proxectos, xa que normalmente son en salas ou noutros lugares. Iso supón para min unha gran ledicia”.
Dourado engadiu que “tamén quero dicir con toda a dignidade da que podo ser capaz que dende o Eido Dourado facemos o que facemos simplemente porque así o queremos e así o sentimos. Nunca fomos pesebristas de ningún político de turno, non somos deudores de axuda nin por suposto branqueadores de subvencións manipuladas. Facemos o que facemos, chegamos ao que chegamos e esperamos resistir ata onde aguantemos, nin máis nin menos”.