Villares: “Todo o que reivindiquemos para A Mariña é pouco, pero coa manifestación deste luns o único que conseguimos é dispersar a mensaxe do gran problema que ameaza e que arrastraría a moitos sectores e servizos: o peche da fábrica de aluminio se o goberno non actúa xa”

 Cervo, 22 de xuño de 2020. O rexedor cervense, Alfonso Villares, precisa que todas as reivindicacións que fagamos para mellorar a nosa Comarca son poucas, pero considera “desapropiada” a manifestación que terá lugar esta tarde en Burela “non polo fondo, non polas demandas, que xa digo que moitas máis teriamos que incluír dirixidas á Deputación, á Xunta, ao Goberno…; senón polo momento no que nos atopamos, porque penso que “o único que imos conseguir é dispersar a mensaxe e desviarnos do gran problema que ameaza hoxe a toda a bisbarra e a moitos sectores e servizos: o inminente peche da nosa fábrica de aluminio se o Goberno non actúa xa”.
Neste senso, Villares recorda que “levamos case dous anos reclamando todos os mariñáns, capitaneados polo comité de empresa de Alcoa, a aprobación dun estatuto de empresas hiperelectrointesivas que non chega”, polo que esta concentración o que si que podería ser é unha boa oportunidade para instar aos dirixentes socialistas que acudan a ela “a que amosen dunha vez por todas este documento e que lle esixan ao Goberno do Estado que convoque urxentemente a poxa de interrompibilidade para o segundo semestre do ano, incluíndo os bloques de 90 MW, “que nos devolva así a todos os mariñáns eses 70 millóns de euros anuais que nos quitou nestes dous anos, e que desviou cara outros territorios de España; imposibilitando así que podamos seguir a producir aluminio na nosa zona”.
Todos os mariñáns sabemos que mentres non se aprobe ese estatuto –engade- “mentres non se devolvan eses cartos, o único responsable do peche –que temos que intentar evitar como sexa- é o Goberno central que obviou e segue a obviar as demandas conxuntas da bisbarra”.