Finalizan os traballos arqueolóxicos no castro de San tirso de Portocelo

 Xove, 20 de outubro, 2020. Este Luns 19 finalizaron os traballos arqueolóxicos no xacemento de San Tirso de Portocelo, en Xove. As sondaxes quedaron tapados preventivamente para asegurar a súa correcta conservación. Durante o próximos seis meses estudaranse os datos e pezas arqueolóxicas recuperadas, ata o seu posterior depósito no Museo do Castro de Viladonga, tal e como solicita a Dirección Xeral de Patrimonio Cultural da Xunta de Galicia.
A intervención tivo unha duración de tres semanas e obtivéronse resultados de gran interese, coa localización dunha necrópole altomedieval e varias estruturas habitacionais de época galaicorromana. Fixéronse numerosos achados arqueolóxicos, como unha conta de colar de pasta vítrea oculada, diversos restos cerámicos ou un muíño circular, de granito.
O proxecto suscitou gran interese entre a poboación local e foi diariamente visitado por numerosos veciños, que coñeceron de primeira man o desenvolvemento dos traballos e os achados que se ían realizando.
O proxecto cultural de San Tirso de Portocelo, coa colaboración do concello, a ACD Xove e o ANPA do CEIP Xove, realizaron a pasada fin de semana pasada unha xornada de visitas guiadas para adultos e público infantil, con gran afluencia.
O goberno municipal de Xove, financiador da actuación e propietario dos terreos, manifestou o seu interese en continuar coas investigacións arqueolóxicas en San Tirso de Portocelo e seguir dando pasos para a súa posta en valor.