Magna 3-3 Pescados Rubén

 Burela, 23 de outubro, 2020. O Pescados Rubén Burela pecha a apertada axenda da semana cun punto moi valioso na pista de CA Osasuna Magna (3-3), despois da dureza e o esforzo dos últimos días. Grande igualdade viviu a apertura da xornada 6, na que os pupilos de Juanma Marrube souberon como responder a cada acción de iniciativa no marcador dos locais. Tras conseguir o 2-2 rozando o descanso, os galegos souberon como xestionarse tomaron vantaxe pero os navarros devolveron as táboas no ecuador de segundo acto, ofrecendo un pouco máis de vitalidade. A defensa laranxa mantivo baixo control o ataque de cinco no último tramo, con Álex Diz defendendo a rede.

Roberto Martil adiantou os de Imanol Arregui no minuto 6, recibindo de costas o pase de Mancuso. Matamoros tivo o empate a balón parado, pero chocou contra a defensa local. Renato, con todo, si conseguiu materializar a igualada antes do ecuador do primeiro acto, de falta directa. Coa súa presión alta, Pescados Rubén fixo desaparecer a tentativa de dominio local dos primeiros minutos. No 13, Quintela tentou sorprender a Asier nunha saída rápida coa que chegou moi escorado. Tan só 2 minutos despois Edu mantivo o empate, con dobre aparición fronte a Mancuso. No 17, a defensa navarra despexou o que podería ser a iniciativa laranxa nun pé moi oportuno de Matamoros e entón aproveitou velozmente Juninho para recuperar a vantaxe. Renato quixo poñer a proba a Asier sen éxito pero si o fixo Pitero, a falta de 52 segundos para o descanso; a Xoia Laranxa devolveu as táboas culminando un disparo de Matamoros. Chegou a bucina con xogo de cinco para os galegos e tentativa de Magna en contragolpe.

Renato volveu ter de falta na continuación e a escuadra local respondeu pouco despois con roubo de César. A volta á pista dos burelistas foi moi incisiva. Asier desartellou a complicidade entre Javier Rodríguez e David Pazos Rozou o pau a chegada de Quintela en contragolpe. Pelexaron de novo cunha gran presión os do Mariskal para apropiarse do electrónico. Non entanto, Mancuso avisou con moito perigo, ao pau, e acto seguido Fabinho recuperou fronte a unha excelente intervención de Edu. David Pazos aproveitou o erro na saída de balón de Bynho para adiantarse por primeira vez no encontro; cumpríase o 27 de xogo. Eto’o e Renato deron continuidade ao asedio galego. O meta naronés freou a César na medianía do segundo tempo, pero nada puido facer acto seguido ante o 29 local, que aproveitou un descoido laranxa para o 3-3. Linhares probou fortuna por partida dobre fronte a un gran Edu, nos mellores minutos de Magna. A alianza entre Matamoros e Álex Diz fixo tremer a rede de Asier, ao pau, en busca da dianteira. Tras a saída rápida de Fabinho, a ocasión de Mancuso e de tentalo César, Osasuna saíu con porteiro xogador con tres minutos por diante. Edu sacou unha man perfecta ante Fabinho e César. Respondeu Álex Diz con xogo de cinco no último minuto co 3-3 definitivo.

Ficha técnica

CA Osasuna Magna: Asier, Linhares, César Velázquez, Wanderson, Bynho, cinco inicial; tamén xogaron Mancuso, Fabinho, Roberto Martil, Juninho, Jesús

Pescados Rubén Burela FS: Edu, Lucho, Javi Rodríguez, David Pazos, Diego Quintela, cinco inicial; tamén xogaron Álex Diz, Renato, Iago Míguez, Matamoros, Pitero, Giasson, Eto’o

Goles: 1-0, minuto 6, Roberto Martil; 1-1, minuto 9, Renato; 2-1, minuto 17, Juninho; 2-2, minuto 20, Pitero; 2-3, minuto 27, David Pazos; 3-3, minuto 30, César

Árbitros: Sánchez Llorente// Toca Campo (Cantabria). Por Magna amarela para Roberto Martil (minuto 8), Juninho (minuto 18), Wanderson (minuto 29), Fabinho (minuto 35). Por Burela amarela a Matamoros (minuto 6).

Incidencias: Partido correspondente á xornada 6 de Primeira División Masculina disputado en Anaitasuna