O Concello promove o comercio local cunha campaña de agasallos este venres e sábado dentro do programa IMPULSA FOZ

 Foz, 10 de decembro de 2020. O Concello focense promove o comercio local en colaboración coa ACIA-Centro Comercial Aberto nunha campaña de agasallos este venres e sábado, dentro do programa IMPULSA FOZ.

O concelleiro de Turismo e Asuntos Económicos, Chema Linares, traslada a súa preocupación polo pequeno comercio local: “somos coñecedores das dificultades que están a pasar os comercios nesta crise. Cremos que esta campaña, na que colabora a ACIA local, é un aliciente para que máis xente se achegue a Foz a realizar as súas compras: con precaución sempre, pero máis que nunca temos que pensar en axudar a todas as nosas veciñas e veciños autónomos que teñen unha pequena tenda e esquecernos por un momento das grandes plataformas dixitais multinacionais”.

Chema Linares explica que “todos aqueles que fagan compras superiores aos dez euros o venres 11 e sábado 12 de decembro nos comercios adheridos á campaña, poderán achegarse co seu ticket de compra á caseta situada diante do Concello. Por cada ticket será entregado un vale sorpresa cun agasallo seguro. Hai 4 agasallos diferentes, polo que esperamos que todos vos animedes a participar. A caseta estará aberta o venres de 17.00 a 20.00 horas e o sábado de 11.00 a 14.00 horas, nun horario suficiente para evitar calquera tipo de aglomeración”.

O alcalde, Fran Cajoto, espera que “esta campaña sexa un aliciente para vir a Foz, pasear, e tamén desfrutar da nosa hostalería, que dispón de claros exemplos de cómo se poden facer ben as cousas na prevención da COVID e que aínda así está a sufrir as consecuencias económicas da pandemia”.

Fran Cajoto engade que “ao ladiño mesmo da caseta de promoción, tamén diante do Concello, haberá unha segunda instalación con fotos de Foz. Temos lugares ben fermosos e estas imaxes son unha pequena representación deles. Dende o venres 11 e ata o martes 15 de decembro todo aquel que se saque unha foto diante destas imaxes de Foz e a suba ás súas redes sociais –facebook, instagram ou twitter- co hastag #impulsafoz entrará no sorteo de 2 premios, consistentes en vales de compra no noso comercio local (200 euros para o primeiro premio e 100 euros para o segundo). Esperamos que moita xente se anime, debemos coidar Foz e promocionalo entre todas e todos. Podemos estar ben orgullosos do sitio no que vivimos. Isto non deixa de ser un aliciente máis para achegarse á nosa vila. Co alumeado de Nadal acendido e con recunchos con decorados tan espectaculares como o barco Joaquincito, en Tupide, ou a gran árbore de Nadal na Glorieta de Vilalba, pasear polas nosas rúas este mes de decembro é a mellor opción”.