O PP afea ao goberno de Foz a súa teimuda oposición a deseñar e aplicar un plan de axudas para a reactivación da economía focense

 Foz, 5 de febreiro de 2021. O alcalde de Foz, o socialista Francisco Cajoto, demostrou outra vez no recente pleno da corporación municipal cal é o seu sentido da participación na vida institucional. De novo, socialistas e nacionalistas impediron que prosperasen as mocións do Partido Popular que, sen dúbida, eran de gran importancia tanto para promoción do patrimonio do concello como para a saída da crise económica provocada pola pandemia.

O portavoz do PP, Javier Castiñeira, sinala: “O bipartito focense (PSOE-BNG), unha vez máis, bloqueou todo o que propuxo o Partido Popular; neste caso, o PP tivo o apoio de Foz Plataforma de Futuro. Así o vimos outra vez no pleno pasado, no que o PP presentou tres mocións, que foron apoiadas polo concelleiro de Foz Plataforma de futuro”.

Castiñeira explica: “En concreto, unha das mocións era para instar á Deputación a elaborar un plan de mellora do entorno de San Martiño, sobre todo a pavimentación da rúa do Caritel e os aparcadoiros, que non teñen un pavimento adecuado. Novamente, tanto PSOE como BNG xustificaron á Deputación; novamente primaron os intereses da Deputación sobre os dos focenses, despois de que en San Martiño se fixeran obras importantes por outras administración, como son o Estado e a Xunta de Galicia”.

O portavoz dos populares no Concello de Foz e na Deputación sinala: “Tamén votaron en contra a moción do PP para instar a Costas a que emita canto antes o seu informe definitivo sobre a depuradora de Foz; outra vez xustificaron ao Goberno central. Nós entendemos que todos debemos sumar para que isto avance o máis rápido posible. A Xunta de Galicia acaba de poñer 2,5 millóns de euros nos orzamentos para licitar canto antes esta instalación. O informe de costas é necesario, preceptivo, e precisamos que se axilice o máis posible”.

Para Castiñeira, o máis grave da actitude do bigoberno fronte ao PP é que non dubida en ir contra os intereses dos focenses con tal de non apoiar as súas iniciativas. O portavoz popular declara: “PSOE e BNG votaron en contra do plan de reactivación da economía focense. Desenmascaramos ao BNG, que estaba detrás do alcalde, que culpaba ao alcalde diante dos hostaleiros e dicía que non tiña nada que ver nesta decisión, pero despois no pleno viuse claramente que fan o que manda o alcalde; son cómplices de que os hostaleiros e os comerciantes de Foz non teñan un plan de reactivación como teñen outros concellos, que xa van polo segundo plan”.

Os populares agradecen “o voto favorable, a confianza de Foz Plataforma de Futuro, que tamén estivo cos hostaleiros”. Castiñeira cre que, en resumo, no pleno pasado “volvéronse demostrar as mentiras do señor alcalde contra este grupo de hostaleiros, que están sufrindo unha crise como os do resto dos concellos e non están sendo ben tratados polo goberno municipal”.