Isabel Rodríguez esixe á Xunta de Galicia a mesma implicación que demostra o Goberno con Alcoa e pide que asuma as competencias en materia de Industria

A subdelegada interpelou á conselleira de Industria ante a problemática trasladada pola empresa, pedindo que o executivo galego asuma as súas competencias na materia

Lugo, 5 de decembro de 2023. A subdelegada do Goberno en Lugo, Isabel Rodríguez, sae ao paso tras o aprazamento de Alcoa dunha das obras máis agardadas por falta de financiamento, esixindo á Xunta de Galicia maior implicación para garantir a continuidade e reactivación da actividade económica nesta empresa fundamental para a mariña lucense.

Isabel Rodríguez reiterou unha vez máis a necesidade de que a Xunta “asuma as súas competencias en Industria”, interpelando á conselleira de Economía e Industria, María Jesús Lorenzana, para que “poñan solucións sobre a mesa nun asunto que require compromiso real pola gran repercusión que ten tanto na comarca como na provincia”.

A subdelegada explicou que o Goberno traballa desde “o minuto un pola continuidade e mantemento da actividade económica, garantindo tamén os postos de traballo nunha industria vital para a Mariña”. Ademais, ante este anuncio de Alcoa, desde o Goberno comunican que convocarán a Comisión de seguimento para “analizar que todos os puntos do acordo se están a cumprir”.