Barreiros reclama á Xunta un financiamento digno para garantir os coidados das persoas dependentes

Veiga advirte que o SAF atravesa unha situación “moi complexa” no municipio, tanto polo incremento dos custos como polas dificultades organizativas derivadas das baixas laborais

Barreiros, 12 de maio de 2026. A concelleira socialista de Servizos Sociais de Barreiros, Carmen Veiga, conseguiu no pleno o apoio unánime de todos os grupos da Corporación municipal para aprobar o Plan Concertado de Servizos Sociais e reclamar á Xunta de Galicia unha solución ao infrafinanciamento que soporta o Servizo de Axuda no Fogar.

A tenente de alcaldesa explicou que o SAF atravesa unha situación “moi complexa” no municipio, tanto polo incremento dos custos como polas dificultades organizativas derivadas das baixas laborais. Segundo detallou, o servizo conta cun cadro de persoal de 19 traballadoras, das que actualmente 10 están de baixa e 2 de vacacións.

“Estamos facendo malabares para non deixar a ninguén desatendido”, sinalou a concelleira, que lembrou que se trata dun servizo esencial para moitas familias de Barreiros, especialmente nun concello no que o 94% das persoas usuarias son grandes dependentes, con graos 2 e 3 recoñecidos.

Veiga incidiu en que o custo real do SAF xa alcanza os 25 euros por hora, mentres que a achega actual da Xunta é de arredor de 12 euros. Neste sentido, a Corporación coincidiu en considerar insuficiente a suba anunciada polo Goberno de Rueda, de 16 euros nos vindeiros dous anos.

“Hoxe Barreiros fala cunha soa voz: non podemos seguir asumindo con fondos municipais 13 euros de cada hora do SAF. Ese esforzo detrae recursos doutras necesidades básicas da veciñanza e pon contra as cordas as contas municipais”, defendeu Veiga.

A concelleira insistiu en que os concellos están asumindo unha carga económica que non lles corresponde e reclamou que o PP debe garantir dende a Xunta o financiamento necesario para manter un servizo público “imprescindible para a dignidade, os coidados e a calidade de vida das persoas dependentes”.

“O SAF non é un servizo accesorio, é unha prestación básica para que moitas persoas poidan seguir vivindo nas súas casas e no seu entorno. Por iso reclamamos que se financie como corresponde e que non se siga trasladando aos concellos unha responsabilidade que debe estar suficientemente cuberta pola Xunta de Galicia, afirmou.

Veiga puxo en valor que, malia esta situación, Barreiros siga reforzando a atención social no municipio a través de iniciativas como o servizo municipal de préstamo de material ortopédico, que permite ás familias acceder a camas articuladas, guindastres, andadores e outro equipamento de apoio. A concelleira incidiu en que este recurso “está a mellorar a calidade de vida de persoas dependentes e das súas familias”, e concluíu que “a prioridade da área de Servizos Sociais é estar ao carón da veciñanza, acompañar ás familias e garantir que ninguén quede atrás”.