Cervo, 29 de xuño do 2026. A alcaldesa de Cervo, Dolores García Caramés, e o concelleiro Adrián Arias supervisaron o inicio das obras de renovación integral do parque infantil Isaac Díaz Pardo e Luís Seoane, en Cervo, situado na contorna da rotonda próxima á Casa do Concello, unha actuación que supón un investimento de 261.385,74 euros, financiado integramente con fondos propios municipais.
O proxecto contempla a transformación completa das actuais áreas de xogo, mantendo a súa localización, coa substitución de todos os elementos deteriorados por novos xogos homologados, a instalación dun novo pavimento continuo de caucho de seguridade e a renovación do peche perimetral, cumprindo cos estándares máis esixentes en materia de seguridade e accesibilidade.
A actuación permitirá, ademais, ampliar a zona destinada aos nenos e nenas de maior idade, creando un espazo máis amplo, moderno e atractivo, con novas propostas de xogo adaptadas ás diferentes etapas da infancia.
Entre as novidades destaca tamén a incorporación de elementos inclusivos, favorecendo que todos os nenos e nenas poidan compartir o espazo de lecer en igualdade de condicións.
Un dos grandes atractivos do novo parque será a instalación dunha tirolina, un elemento moi demandado polos máis pequenos.
Neste sentido, a alcaldesa explicou que “era unha petición que nos trasladaban con frecuencia os nenos e nenas de Cervo que utilizan habitualmente este parque. Escoitámolos, tomamos nota das súas inquedanzas e hoxe podemos dicir con satisfacción que esa demanda vai ser unha realidade”.
Dolores García Caramés destacou que “esta é unha actuación moi importante para seguir mellorando os espazos públicos destinados á infancia. O parque Luis Seoane e Isaac Díaz Pardo é un punto de encontro para moitas familias e merecía unha renovación integral que garanta a máxima seguridade, accesibilidade e novas oportunidades de xogo”.
A rexedora incidiu ademais en que “apostamos por destinar recursos propios do Concello para ofrecer aos nosos veciños e veciñas instalacións modernas e de calidade. Con este investimento de máis de 261.000 euros renovamos por completo un parque emblemático, ampliando a área de xogos para os maiores e incorporando elementos inclusivos e unha tirolina que sabemos que fará as delicias dos máis pequenos”.
O novo parque contará cunha gran estrutura de aventura para os maiores, outra adaptada ás primeiras idades, novos columpios, xogos de muelle, elementos inclusivos e a nova tirolina, todo instalado sobre pavimento continuo de seguridade e cun novo peche perimetral que reforzará a protección do recinto.
Con esta actuación, o Concello de Cervo continúa avanzando na mellora dos espazos públicos destinados á infancia, dotando ao municipio dun parque moderno, accesible, seguro e preparado para responder ás necesidades actuais das familias.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
