Unha quincena de persoas participa no curso de tiro con arco impartido por Jorge Galante

Unha quincena de persoas participa no Curso de tiro con arco impartido por Jorge Galante

-O alumnado vai dos 7 aos 43 anos, aínda que os pequenos son maioría

-Gabriel Galante, fillo do adestrador e campión de España de menores de 14 anos tamén acode á actividade

Cervo, 20 de xuño de 2012-Un total de 15 persoas de entre 7 e 43 anos inícianse estes días en Cervo na práctica do tiro con arco. O curso desenvólvese ao longo desta semana no auditorio da Casa do Mar de San Ciprián en dúas quendas, de 17:00 a 18:00 e de 18:00 a 19:00, co obxectivo de conformar grupos reducidos que permitan unha aprendizaxe máis personalizada.

O curso está impartido por Jorge Galante, adestrador acreditado pola Federación Galega de Tiro con Arco para poder ensinar esta disciplina; e pai de Gabriel Galante, o recentemente proclamado campión de España de tiro con arco menores de 14 anos, que tamén está acudindo ao curso.

Entre o alumnado, a meirande parte son nenos e nenas que desexan aprender a manexar o arco e as frechas e adquirir algunhas nocións sobre a técnica do tiro con arco. O material necesario para a aprendizaxe foi achegado pola Federación, que colabora co Concello nesta actividade, e no caso das frechas son adaptadas ao nivel de iniciación do curso, polo que non implican ningún perigo para o alumnado.

“Este curso é unha moi boa oportunidade para fomentar a práctica de deportes non maioritarios e dar a coñecer disciplinas olímpicas como o tiro con arco” asegura o edil de Deportes, “especialmente entre os pequenos e a mocidade, o público predominante neste curso”. Ademais, segundo Soto, “é un luxo que entre o alumnado se atope o campión de España en menores de 14 anos, xa que é un excelente exemplo de como con esforzo e ilusión se pode chegar moi lonxe, no deporte e na vida”.