O BNG da Mariña pide que se paralicen as subas nas cotizacións de persoas autónomas e pequenas empresas

A Mariña, 24 de xaneiro de 2014. O Bloque Nacionalista Galego na Mariña emprenderá unha campaña contraria á suba das cotizacións para as persoas autónomas e pequenas empresas, ao considerar que “a súa situación económica xa é, de por si, crítica; principalmente pola dificultade para obter crédito e se, por riba, o goberno central aproba medidas, como vén de facer, que supoñen incrementar os seus custos fixos, a supervivencia deste sector faise cada día máis difícil.”

Por iso, desde o BNG instarán a todas as corporacións municipais, por medio da presentación de mocións nos distintos plenos, a que soliciten do goberno central a marcha atrás na suba das cotizacións para este colectivo e que se aposte por unha reforma fiscal realmente progresiva. Desde a formación frontista consideran que “a día de hoxe as persoas autónomas e as pequenas empresas son as que están amortiguando o desemprego ao atopar moitas das persoas desempregadas no autoemprego a súa única saída e co mantemento de numerosos postos de traballo que dependen da superviviencia dos pequenos negocios.”

Para o BNG na Mariña “estas últimas medidas do goberno central ao único que contribúen é ao estrangulamento económico das persoas autónomas e emprendedoras, mentres ese mesmo goberno non cesa no apoio a bancos (que seguen sen dar acceso ao crédito) e ás grandes empresas.”

Segundo indican os nacionalistas “estas medidas teñen unha importancia vital na nosa comarca, xa moi golpeada polo peche de empresas e o estrangulamento de determinados sectores, claves para que poida existir consumo e manter a liquidez de persoas autónomas e pequenas empresas.”

Neste sentido, a formación nacionalista convocou ao sector e ás asociacións que o representan a unha xuntanza para o vindeiro mércores, 29 de xaneiro, ás 21 horas no hotel Nordés, en Burela. Nesta xuntanza, analizarán o estado do sector na comarca co fin de obter unha diagnose e emprender as accións enfocadas a defender os seus intereses que, consideran, son o interese do conxunto da comarca.