A Corporación Municipal de Foz lembra nunha declaración institucional “as boas infraestruturas públicas das que se beneficia Alcoa”

04 Xuño, 2016

Foz, 4 de xuño de 2016. O alcalde de Foz, Javier Jorge Castiñeira, anunciou este sábado que ante as manifestacións que se veñen coñecendo durante estes pasados días nos medios de comunicación nas que se anuncia a intención da multinacional Alcoa, actual propietaria das industrias dedicadas ao sector da fabricación de aluminio tanto en San Cibrao como na Coruña e Avilés, de iniciar os tramites de valoración xeral das instalacións e contemplar incluso a posibilidade de venda das mesmas, a corporación municipal focense quere expresar a seguinte declaración institucional:

Ante a incerteza que crea na sociedade mariñán e no noso propio concello a nova postura da multinacional Alcoa e posto que son moitos os empregos e moita a actividade empresarial que xera dita factoría na Mariña lucense, queremos unirnos á opinión que mostran os comités de empresa e mesmo outras administracións, como a Deputación de Lugo e a Xunta de Galicia, desexando un futuro certo, estable e prospero para esta industria, sexa quen sexa o propietario.

A viabilidade da fabrica de San Cibrao é completamente innegable, non só polos resultados económicos mostrados durante todos estes anos ou pola excepcional calidade do produto que resulta dela senón pola capacidade e profesionalidade dos seus traballadores e, por suposto, tamén polo tremendo esforzo que a sociedade galega e a mariñán especialmente, fixo sempre para que esta industria sexa tremendamente competitiva.

Grandes infraestruturas ao seu servizo, con investimentos millonarios de diñeiro público dende a súa creación, incluído un porto de uso exclusivo, e outras infraestruturas interiores e investimentos públicos recentes, como a autovía do Cantábrico e a conexión prevista da fábrica coa A-8, e mesmo infraestruturas enerxéticas como as liñas eléctricas e o novo gasoduto, polo que non debería ser moeda de cambio ou produto especulativo de ningún interese externo que non contemple un proxecto serio que conte coa aprobación dunha gran maioría social e institucional da nosa comarca.

Solicitamos aos responsables da actual propietaria Alcoa e máis aos gobernos da Xunta de Galicia e do Estado o máximo rigor á hora de falar sobre o futuro da fábrica de San Cibrao e o máximo respecto aos traballadores e á sociedade mariñán en xeral, sempre sensible a informacións relacionadas coa planta, e que calquera paso que se dea neste sentido contemple os intereses xerais da nosa comarca, perfectamente compatibles con calquera outro interese económico empresarial serio e sostible, que inclúa o mantemento do proceso produtivo e os postos de traballo actuais.

Ademais dende a Corporación Municipal de Foz avogamos por un sistema enerxético sostible, pero tamén garantista e con seguridade xurídica para que grandes consumidores, como as fábricas de aluminio e outros, consigan un prezo da enerxía competitivo e razoable.