21 de Outubro de 2019

Correo | Favoritos  | Imprimir   

Galicia acolle por primeira vez un Campionato Nacional de TPV en Espeleoloxía. Desenvolverase esta fin de semana no pavillón de deportes de Mondoñedo

10-10-19

 Mondoñedo, 10 de outubro, 2019. Galicia acolle, por primeira vez, un Campionato Nacional de Técnicas de Progresión Vertical en Espeleoloxía, que se desenvolverá esta fin de semana no pavillón de deportes de Mondoñedo e ao que se inscribiron participantes nesta espectacular disciplina deportiva dun total de sete comunidades autónomas.

O Concello de Mondoñedo volve converterse así no punto neurálxico da Espeleoloxía en España ao colaborar neste evento, o cal está organizado pola Federación Galega de Espeleoloxía, en nome da Confederación de Espeleología y Cañones, parte do cal patrocina a Secretaría Xeral para o Deporte da Xunta de Galicia.

Ata a localidade chegarán -xa o venres, 11- os mellores deportistas españois, representando a Galicia, Comunidade Valenciana, Rioja, Cataluña, Comunidad de Madrid, Navarra e Castilla-A Mancha, con idades comprendidas entre os 9 e os 69 anos, que demostrarán a súa destreza nas categorías alevín, infantil, xuvenil, maior e veterano.

Mulleres e homes competirán nas respectivas probas, elixidas das seguintes: Velocidade, Técnica Vertical (Resistencia), Circuito de progresión vertical en parede, Circuito equipos (mixta) e Auto socorro. Para iso, a dirección e varios técnicos deportivos da Escola Galega de Espeleoloxía instalaron un circuíto nunha das paredes interiores do pavillón, onde realizarase esta actividade.

A entrada a este evento é gratuita, e o groso da competición está previsto que teña lugar ao longo do sábado, 12 de outubro, desde as 10 da mañá, cun descanso para comer, e que finalice pola tarde.

A entrega de medallas está prevista o domingo ás 12 da mañá, da man da alcaldesa de Mondoñedo, Dna. Elena Candia López, coa asistencia do Xefe de Deportes en Lugo da SXD, D. Manuel Otero Méndez. Tras o acto, procederase á despedida dos competidores e á recollida da loxística, por parte dunha vintena de voluntarios.

Website Pin Facebook Twitter Myspace Friendfeed Technorati del.icio.us Digg Google StumbleUpon Premium Responsive