O concelleiro de Medio Ambiente de Ribadeo descualifica o portavoz da UPRI para rexeitar críticas

RIBADEO (FNC) .- O concelleiro de Medio Ambiente, Horacio Cupeiro, rexeita as críticas realizadas nos últimos días desde Upri e tacha o seu portavoz de “mentirán, oportunista, ilusionista e interesado”.

O edil nacionalista dálle as grazas a Francisco Rivas por ter pedido a súa dimisión “porque como di un veciño meu si piden a túa dimisión é porque traballas ou aquela de ladran logo avanzamos. Ao falar de incompetente debe referirse a outro porque na miña vida profesional tiven cargos de moita responsabilidade, quince anos nunha empresa privada cunha nota de sobresaliente cando deixei de traballar nela e a continuación fíxenme funcionario da Axencia Tributaria, onde tamén tiven cargos de responsabilidade como moi ben podo demostrar si fose mester”.

Cupeiro rexeitou as acusacións de mentireiro verquidas desde Upri. O concelleiro de Medio Ambiente subliñou que “eu as cousas que digo é porque as podo demostrar. Vostede si que é un grande mentireiro porque andou enganando polas parroquias os veciños dicindo que lles ían tirar as casas porque se aumentaba o ancho das rúas. Á miña casa e polas aldeas cando vou atopeime xente chorando e pedíndonos clemencia porque vostede lles andaba argumentando todo iso. Tamén tentou convencer aos veciños para nos puxesen dificultades coa depuradora”.

Horacio Cupeiro asegurou que Francisco Rivas “mentiu e minte ao dicir que o vertedoiro selado estaba correctamente cando nin o biogás nin os lixiviados se trataban de xeito adecuado e ademais non lle dixo ao pobo o que reflicte un documento que teño aquí diante dos meus ollos e que di como consecuencia dos verquidos de máis de 17.000 metros cúbicos de terras que non foi autorizado pola Consellería de Medio Ambiente houbo que incrementar o presuposto de selado do vertedoiro de 104 a 111 millóns das antigas pesetas. E señor Rivas a terra esa ¿de onde veu? ¿sería a que veu do Eroski?. Mentiu tamén cando dixo que ía solucionar o problema do mercado, xa se viu o que conseguiu armar un lío igual que fixo coa liña de alta tensión dicindo que si sabíamos, que se non…agora resulta que ninguén di nada porque a vai marcar a Xunta. E mentira tamén é presuntamente ir a Madrid no coche dun amigo e pasarlle ao Concello os gastos de quilometraxe”. O responsable de Medio Ambiente considera que o voceiro de Upri “non é persoa máis axeitada para botarme en cara o da dignidade porque vostede aínda que o machaquen a labazadas non se pon colorado”.

Balance do traballo realizado

Horacio Cupeiro fixo un balance do traballo realizado ao longo deste mandato “quérolle explicar a Francisco Rivas o que fago nas horas que paso no Concello porque parece que lle preocupa moito iso. Conseguín un tractor rozadora e un camión do lixo, solucionar o problema que me deixou do vertedoiro selado e a tramitación de Reny Picot, solucionar o problema de selado da fábrica de algas, implantar a recollida de cartón porta a porta, a instalación de contedores para a recollida do aceite de fritura, as melloras na recollida selectiva onde pasamos do 52 ao 30% de indebidos, a limpeza de contedores de xeito gratuíto, o núcleo de sostibilidade, a reserva da biosfera na que estamos a participar, a limpeza de toda a costa que se está a rozar de xeito gratuíto, o baleirado das fosas sépticas das Catedrais cada dous días…”.

O concelleiro nacionalista engadiu “xunto co alcalde de Ribadeo participei na xestión e consecución dos aparcadoiros das Catedrais, as rutas de sendeirismo, o tren mineiro con proxecto en marcha, as cetáreas de Rinlo, os contedores soterrados en Rinlo e en Ribadeo, o estudio arqueolóxico do Castro das Grobas, o recoñecemento da Consellería polos cambios do alcance do EMAS, a axenda 21 escolar, a participación de Ribadeo na asociación de Concellos entre Asturias e Galicia, a loita pola residencia de enfermos de alzheimer de Ove, a reparación das Casa da Ría que acolleu os encontros de astronomía e Estalmat, a Q de calidade das praias, as bandeiras verdes, a organización das xornadas medioambientais con carácter bianual e de xeito austero… a colocación de contedores para a recollida do vidro, e vostede señor Rivas moito oportunismo, un gran ilusionista, un mentiroso e un interesado”.