A edil de Medio Ambiente de Cervo asegura as praias do término municipal estarán en óptimas condicións

Nota de prensa

ARMADA AGRADECE A PREOCUPACIÓN DE LARA MÉNDEZ POLA PRAIA DO TORNO, AÍNDA QUE BOTA DE MENOS QUE ESTE “REPENTINO” INTERESE DA VOCEIRA SOCIALISTA E RESPONSABLE DA DEPUTACIÓN NON SE TIVERA REFLECTIDO NESTES CATRO ANOS EN AXUDAS MATERIAIS DO ENTE PROVINCIAL PARA A CONSERVACIÓN DESTE AREAL

Cervo, 9 de abril de 2010.- A concelleira de Medio Ambiente do Concello de Cervo, Pilar Armada, respondeu ás criticas verquidas pola concelleira socialista Lara Méndez en relación ó suposto abandono da praia do Torno de San Ciprián.

Para armada “é de agradecer” a “repentina” preocupación amosada por Lara Méndez no coidado e arranxo deste areal, aínda que botou en falta que este interese nunca se tivera materializado nestes catro anos con algunha xestión súa dende a Deputación Provincial. “Agradecemos a preocupación desta señora polo estado da praia do Torno, pero penso que ademais de criticarnos, tamén podería ter feito algún tipo de xestión nestes catro anos para que a Deputación colaborase co Concello para o adecentamento e o arranxo dos nosos areais” sinalou a edil do Grupo de Goberno.

Armada apoiou as súas manifestacións lembrando que os actuais rexedores do organismo provincial levan denegándolle ao concello a cesión dunha pala motoniveladora para adecentar os areais do termo municipal dende que accederon ao poder na Deputación. “Levamos todos estes anos solicitándolles por escrito a utilización desta maquinaria igual que o facíamos cos anteriores responsables provinciais, pero dende que a señora Lara Méndez, os seus compañeiros de partido e os nacionalistas accederon ao poder deste organismo provincial nunca nos contestaron. Tan só se limitaron a utilizar de xeito covarde o silencio administrativo para denegarnos a cesión dunha maquinaria que é propiedade do parque provincial e que debería estar ao servizo de tódolos concellos da provincia sen excepción” engadiu.

Para Armada, esta “nula colaboración” de socialistas e nacionalistas á fronte ente provincial con Cervo deixa en evidencia cal é o compromiso real dos actuais gobernantes da Deputación en materia medioambiental e de promoción do litoral lucense con algúns dos municipios costeiros. “Por iso, dubidamos que as súas intencións nesta materia sexan realmente con ánimo de colaborar, se non máis ben parece que pretenden polemizar e confrontar interesadamente co obxecto de sacar rendibilidade política a través de manifestacións sesgadas na prensa”.

Por último, Armada asegurou que todas as praias do término municipal estarán en óptimas condicións “porque o Concello é responsable e fará os traballos que sexan necesarios para telas en perfecto estado para o seu uso e disfrute como sempre leva feito nestes últimos doce anos”recalcou Armada.