Héitor Picallo reivindica a figura de dona Urraca en Ribadeo

Ribadeo, 15 de marzo, 2026. O investigador Héitor Picallo, autor de numerosos estudos sobre a historia do Reino de Galiza —moitos deles publicados no diario Nós— achegou unha visión máis detallada da figura de dona Urraca, coñecida como totius Gallecie Imperatrix.

As crónicas da súa época presentábana a miúdo como unha muller sometida aos designios do seu pai ou dos seus maridos; ás veces era descrita como vítima das circunstancias e outras como unha figura inestábel. Porén, tal e como explicou Picallo, dona Urraca tivo un papel decisivo nun momento histórico no que Galiza vivía entre dous mundos: por unha banda, asistía á súa fragmentación definitiva en catro reinos —Castela, León, Galiza e Portugal— e, pola outra, experimentaba un dos períodos de maior esplendor sociocultural e relixioso, a coñecida Era Compostelá.

Tras a conferencia, quedou patente que dona Urraca foi unha muller que loitou con firmeza por defender a súa posición política nun taboleiro de xogo hispánico reservado case exclusivamente aos homes. Filla do seu tempo, exerceu o poder con determinación e tratou de superar os constantes atrancos que a Igrexa compostelá lle impuña.

Desde a Agrupación Cultural Francisco Lanza maniféstase a vontade de continuar afondando na historia propia, con especial atención á Idade Media, etapa na que Galiza foi un reino plenamente recoñecido, por moito que certa historiografía aínda hoxe pretenda negalo.

Devagar pero con constancia, a entidade aspira a que a sociedade galega asuma con naturalidade esta realidade histórica, avalada por arquivos de toda Europa e que, tarde ou cedo, tamén deberá ser recoñecida máis alá do Padornelo.