O goberno lémbralle a Estúa que será o único asesor no Concello de Cervo e o seu posto implicará un gasto público de 32.000 euros
Cervo, 6 de xuño de 2012-O goberno cervense lembroulle hoxe a Xosé Antón Estúa o salario que percibe como asesor do BNG na Deputación, “un cargo que lle gusta criticar con moita asiduidade pero que el mesmo ocupa”. Para o executivo local, Estúa ten dúas caras: “no Concello de Cervo demoniza aos asesores e cando chega á Deputación senta no seu despacho de asesor polo que percibe 32.000 euros ao ano”, polo que semella que “as regras do xogo cambian cada vez que sae do termo municipal de Cervo”.
Para a súa “tranquilidade”, o grupo de goberno asegurou que “o único asesor que haberá en Cervo a partir deste mes de xuño será o señor Estúa”, ao que se lle atribúen “méritos” como “non mover un dedo dende a Deputación para a adquisición dos terreos que permitan a ampliación do Museo do Mar” ou formar parte dun partido que “apoiou unha inxusta multa de 20.000 euros contra os seus propios veciños”.
O goberno municipal tamén considera que o traballo de Xosé Antón Estúa é “surrealista” ao tratarse de “asesorar a un partido, o BNG, que non cre nas deputacións, que renega delas e que avoga por suprimilas”. Polo tanto, resulta “incomprensible e incluso inútil que o señor Estúa cobre por asesorar a quen semella máis centrado en rematar coa Deputación que por traballar pola cidadanía”.