Remata a 4ª tempada de Km0, o programa co que máis de 35.700 lucenses xa redescubriron a provincia
– A Deputada de Economía recibiu hoxe ó último grupo da edición 2011/2012, un grupo de 48 persoa anotadas de xeito individual que fixeron a ruta Mosteiro-Pantón
– O programa medioambiental, que retornará en setembro, xerou dende a súa posta en marcha un volume de negocio de preto de 1,5 millón de euros, beneficiando a 250 empresas que dan emprego directo a case 1.400 persoas en sectores estratéxicos
– Nesta edición introduciuse por primeira vez a modalidade de pago, así como a variante Km0 Fin de Semana
A cuarta tempada do programa Km0, impulsado pola Deputación de Lugo co obxectivo de aproveitar a potencialidade do medio ambiente para xerar riqueza na provincia, chegou este martes ó seu remate, acumulando xa máis de 35.700 participantes dende a súa posta en marcha en 2008. A Deputada de Economía, Recadación e Facenda, Pilar García Porto, recibiu hoxe ó último grupo da edición 2011/2012 de Km0: 48 persoas anotadas de xeito individual, que fixeron a ruta Mosteiro-Pantón. Trala recepción, no Salón de Plenos do Pazo de San Marcos, visitaron o Centro de Artesanía e Deseño, dependente da Deputación, situado na Travesía da Rúa Chantada, para máis tarde dar un paseo polo Río Rato. Logo achegáronse á Reitoral de Santiago de Castillón para comer, e xa pola tarde visitaron San Miguel de Eiré, O Mosteiro de Ferreira de Pantón e a Bodega de Casa Moreiras. A actividade de Km0 retomarase en setembro, chegando á súa quinta tempada.
O proxecto xerou un volume de negocio de preto de 1,5 millóns de euros dende a súa posta en marcha grazas á participación de máis de 35.700 persoas de case 390 asociacións nun total de 752 rutas. Deses preto de 1,5 millóns, un total de 1,1 foron beneficios directos para as preto de 250 empresas colaboradoras, todas PEMES e autónomos, que dan emprego directo a preto de 1.400 persoas en sectores estratéxicos da economía lucense, como son a hostalería, o comercio, a artesanía ou o turismo, xa que os participantes paran en restaurantes, casas de turismo rural, pero tamén lonxas, adegas, queixerías, fábricas de embutidos, produtores de fabas, obradoiros artesáns, museos ou parques naturais. O importe restante, preto de 340.000 euros, correspóndense ó gasto indirecto dos participantes.
Co aval da Unión Europea
Este programa está avalado pola Unión Europea, pois concedeulle á Deputación fondos especificamente destinados a este fin a través do plan Lug02. Sen embargo, ante a previsión de que podan acabarse os fondos europeos e poder sobrevivir máis alá das axudas públicas da administración, nesta edición, a institución provincial introduciu, por primeira vez, a modalidade de pago, a un prezo de 5 ou 8 euros, agás colexios e institutos públicos, para garantir a continuidade do programa medioambiental. O prezo rebáixase nun 10% a quen realice o abono on line.
Tamén as fins de semana
Nesta cuarta tempada, en concreto, o pasado 7 de xullo, estreouse tamén a variante Km0 Fin de Semana, que a institución decidiu poñer en marcha tras constatar, grazas á un exhaustivo balance elaborado por persoal da Deputación, os beneficios económicos que xera este programa e pola demanda das propias empresas colaboradoras. A Deputación conta de feito con ducias de escritos de empresas felicitándoa por ter emprendido esta iniciativa e que lle dea continuidade.
Con esta nova modalidade de fin de semana, o organismo provincial pretende abrir o abano de público participante e cubrir as peticións das máis de 7.600 persoas que había á espera de facer unha ruta. De xeito paralelo, nesta edición tamén se potenciou o Km0 en inglés, é dicir, o mesmo programa de rutas, pero con guías neste idioma, especialmente dirixido para persoas que queiran practicar o inglés.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
