O Concello de Cervo entrega cheques das axudas de libros e material escolar a 23 familias

O Concello entrega os cheques das axudas de libros e material escolar a 23 familias destinando un total de 2.300 euros

-O número de alumnos beneficiarios sitúase nos 25, xa que hai casos de dúas solicitudes por familia

Cervo, 16 de novembro de 2012-O alcalde de Cervo, Alfonso Villares e a edil de Educación, Pilar Armada fixeron hoxe entrega dos cheques das axudas de libros e material escolar para alumnos de educación infantil, que foron concedidas para 25 escolares e cun importe total de 2.300 euros. En concreto, foron 23 as familias beneficiarias, xa que houbo dous casos nos que unha mesma unidade familiar solicitou dúas axudas, unha para cada fillo. Lembrar que a subvención outórgase por cada alumno.

As subvencións cobren os gastos asumidos polas familias para adquirir os libros e o material necesario para afrontar o curso 2012-2013 ata un máximo de 130 euros por neno ou nena. Deste xeito, a contía total que asume o Concello está repartida entre cada unidade familiar segundo os gastos xustificados por cada unha.

Para optar a esta subvención era necesario que o neno ou nena estivera escolarizado en segundo ciclo de educación infantil nalgún centro educativo público do municipio e que a unidade familiar non superara os ingresos máximos establecidos nas bases.

Esta é unha das múltiples liñas de axuda dispostas polo goberno local no eido educativo e sufragadas ao 100% con fondos municipais. “As subvencións ás entidades educativas ou as axudas ao transporte escolar son outras das achegas previstas e que veñen sendo habituais nos últimos anos como unha forma de contribuír na igualdade de condicións e na mellora da calidade educativa” explica Armada. A edil asegura que con esta axuda para o material escolar e libros “preténdese aliviar o gasto que supón o comezo dun novo curso para a economía familiar”.