Candia: “Martínez recoñece que pode existir un desfase de polo menos 190.000 euros na estrada Marco Álvare-As Rodrigas, en Riotorto”

Lugo 27-4-2013: “Se a Deputación detecta que a empresa cobrou máis cartos do que lle correspondería pola obra executada, reclamará a diferenza á concesionaria”. Foi a resposta dada polo voceiro do equipo de goberno, Manuel Martínez, o que ven a confirmar que pode existir un desfase de alo menos 190.000 euros na estrada Marco Álvare- As Rodrigas.

“Sorprende moito que efectuado o último pago, o 28 de setembro de 2012 o señor Martínez descoñeza a día de hoxe, se está ben ou mal pagado, máxime cando no expediente figura unha proposta de resolución contractual de mutuo acordo entre a empresa e a Deputación de Lugo, con data 1 de febreiro de 2013, materializando a vontade do organismo provincial de devolver o aval”- manifesta Elena Candia.

Afirma a voceira do PP na Deputación que a cantidade que figura no aval non garante o desfase detectado xa que, agás erro ou omisión, o aval acada a cantidade de 40.269 euros e o desfase detectado supera os 190.000 euros.

Lembra Candia que sumada a piscina de Monterroso, estamos a falar de desfases, por parte do organismo provincial, que superan os 85 millóns de pesetas, entre cantidade de diñeiro certificada e pagada e unidades de obra pendentes de executar.

Conclúe a popular manifestando que todas estas informacións confirman a necesidade de depurar responsabilidades políticas dado que pon de manifesto a falta de capacidade do que fai a Deputación cos cartos dos lucenses e asegura que o seu partido ten documentación que avala a súa información.