O Concello de Cervo agradece ás persoas, colectivos, comercios e empresas que colaboraron no Encontro de Palilleiras

Cervo, 8 de abril de 2013-O Concello de Cervo, a través da Concellería de Igualdade, quixo facer un agradecemento público a todas as persoas, asociacións, comercios e empresas que colaboraron co X Encontro de Palilleiras de San Cibrao que se celebrou o pasado sábado. A edil de Igualdade, Pilar Armada, asegurou que “un evento tan grande e con tanta repercusión coma este só é posible cando se unen os esforzos particulares”.

A concelleira quixo facer unha mención expresa a Modesta Lombardero e Mariluz Méndez, “artífices a promotoras do encontro, que levan dez anos implicándose ao cen por cen na súa organización e máximas responsables de que edición tras edición sigan acudindo centos de palilleiras” engade Armada. A delegada de Igualdade lembrou que “hai un grande traballo detrás deste encontro, que se comeza a organizar meses antes”. O Concello fixo entrega ás dúas profesoras duns detalles de recoñecemento á súa labor nestes anos de encontro.

Armada deulles as grazas tamén a todos os comercios, empresas, entidades e asociacións que achegaron os produtos e artigos que se sortearon ao remate do Encontro de Palilleiras: Labores Mabe San Ciprián, Fábrica de Sargadelos, Cerámicas Gudín, Eladio Bello Máquinas de Coser, Mercería e decoración Ajuar, Autos Rodríguez, Cesáreo Eijo Canoura Multicarpas, Distribucións Carreiras, Presencia Hilaturas, Asociación Alborada e Fundación Centro Galego de Artesanía e do Deseño.

A edil tamén tivo palabras de gratitude para outros colaboradores como o grupo folclórico Airiños do Xunco, que animou a xornada con música tradicional, a Asociación de Montes de San Román, que prestou material, sen esquecerse do persoal de axuda a domicilio do Concello e do servizo municipal de obras, os efectivos da Policía Local e voluntarios de Protección Civil. Ao mesmo tempo, a edil tamén quixo destacar as achegas feitas por particulares e que fixeron posible a exposición “Encaixe nos meniños” na que se amosaron máis de 200 pezas de roupa e complementos con encaixe.

“O traballo de todos tivo como resultado unha xornada de reunión e encontro con máis de 600 palilleiras de todas as idades, destacando a presenza de preto de 20 rapazas e mozas, e a asistencia de numeroso público que se achegou ata o pavillón da Veiga para ver e escoitar en directo este espectáculo da artesanía” remata Armada.