“Os senadores do PP de Lugo: ou engano ou ignorancia”. César Mogo

Os senadores do PP de Lugo, tras as súas vacacións, retomaron a farsa coa que queren enganar aos lucenses. Esta vez a conta da A74 sobre a que xa se deron os primeiros avances na súa tramitación.

Como é coñecido, aprovéitanse da súa maioría absoluta no Senado para facer ver que as súas mocións son de obrigado cumprimento. Unha de dúas; ou enganan deliberadamente ou, o que lles levaría ao ridículo, ignoran que desde hai máis de 30 anos o Tribunal Constitucional, e tamén o Tribunal Supremo, deixaron claro que as mocións carecen de efectos xurídicos. Por tanto, o PP no Senado dedica o seu tempo a promover a confrontación, sen querer chegar a ningún acordo e só co propósito de retratarse nos medios de comunicación. A ningunha outra cousa dedican o seu tempo.

Pero non é só mentira ou ignorancia; tamén incorren nunha manifesta contradición. Porque se tivesen interese real na a Autovía anunciarían que cando se presenten os Orzamentos do Estado e inclúan partidas para a súa construción, apoiaranos. Pero o PP xa anunciou que votarán contra eles. Por tanto, os senadores piden para A Mariña o que chegado o momento xa se anticipou que van rexeitar. Ou Balseiro, Barreiro e Serrano darán a sorpresa, desmarcaranse de Feijoo e votarán a favor?

A todo iso, engaden unha descarada hipocrisía porque esixen para a A74 e escóndense para pedir á Xunta o mesmo para a VAC Costa Norte ou para a variante de Viveiro, que tamén son vitais para as comunicacións da Mariña. Para estas non valen as mocións aprobadas polo Parlamento de Galicia?

Nin se lles ve por un só centro de saúde dos moitos con falta de profesionais, nin queren nin ouvir unha palabra das moitas débedas en infraestruturas que ten con Lugo a Xunta gobernada polo PP

É posible que os senadores do PP teñan razóns para estar desesperados por saír nos xornais, aínda que as eleccións xerais e as candidaturas dos partidos queden moi lonxe. Pero máis razóns hai para saber que o que fan no Senado, meteduras de pata incluídas, non serve para nada a un só lucense

César Mogo
Senador socialista por Lugo