José Manuel Balseiro será o novo portavoz de traballo do Grupo Popular no Senado

O senador lucense asumirá a responsabilidade desta área na Cámara Alta, unha materia da que xa foi portavoz no Parlamento de Galicia

Lugo, 12 de setembro de 2026. O senador lucense José Manuel Balseiro Orol foi designado novo portavoz de Traballo do Grupo Parlamentario Popular no Senado. Deste xeito, Balseiro pasa a asumir a representación do principal grupo do Senado nunha das áreas con maior incidencia directa na vida diaria dos cidadáns, relacionada co emprego, a calidade e estabilidade dos postos de traballo, as relacións laborais, a negociación colectiva, a prevención de riscos laborais e as políticas que afectan a empresas, autónomos e traballadores.

Para o senador popular, esta nova responsabilidade supón “unha honra, pero sobre todo unha enorme responsabilidade”, e comprometeuse a exercela “desde o diálogo cos axentes sociais, o contacto coa realidade dos traballadores e das empresas e a defensa de políticas que favorezan a creación de emprego e a competitividade”.

A designación ten ademais unha especial relevancia para a provincia de Lugo, ao situar a un senador lucense como responsable a nivel nacional dunha das principais áreas de traballo parlamentario do Grupo Popular na Cámara Alta.

Balseiro xa conta cunha ampla experiencia nesta materia. Durante a pasada lexislatura do Parlamento de Galicia exerceu como portavoz de Emprego do Grupo Parlamentario Popular, responsabilidade que compatibilizou coa portavocía de Infraestruturas. Agora trasladará esa experiencia ao Senado, dando continuidade ao seu labor político nun ámbito que coñece de primeira man.

Natural do Valadouro, José Manuel Balseiro reside en San Cibrao, no municipio de Cervo, onde tamén é concelleiro e foi tenente de alcalde desde 1999 ata 2016, antes da súa designación como Delegado Territorial da Xunta en Lugo.

A súa traxectoria institucional está estreitamente ligada ao Parlamento de Galicia, onde foi deputado durante varias lexislaturas desde 2005. Entre outras responsabilidades, exerceu como secretario da Mesa do Parlamento, portavoz de Pesca, portavoz de Montes e, máis recentemente, portavoz de Infraestruturas e Emprego do Grupo Popular. Entre 2016 e 2020 foi tamén delegado territorial da Xunta de Galicia en Lugo

Na actualidade é senador pola provincia de Lugo e desenvolve unha intensa actividade na Cámara Alta. Balseiro é vicepresidente primeiro da Comisión de Investigación sobre os contratos e operacións vinculadas á trama Koldo e ao denominado caso Ábalos, e forma parte tamén das comisións de Transportes e Mobilidade Sostible, Facenda, Pesca e Traballo e Economía Social. Ademais, é membro da Comisión de Investigación sobre as deficiencias e presuntas irregularidades na xestión da Sociedade Estatal de Participacións Industriais (SEPI).

Balseiro destacou que a súa condición de portavoz nacional permitirá tamén trasladar ao debate parlamentario “a realidade dunha provincia como Lugo, cun importante peso do emprego industrial, agroalimentario e pesqueiro, cun tecido formado fundamentalmente por pemes e autónomos e cunhas necesidades específicas vinculadas ao rural e ao reto demográfico”.

O senador lucense asegura que afronta esta nova etapa coa vontade de “defender políticas laborais que creen oportunidades, dean seguridade aos traballadores, faciliten a actividade de autónomos e empresas e permitan que territorios como Lugo poidan competir en igualdade de condicións”. “É unha responsabilidade nacional que asumirei pensando no conxunto de España, pero tamén coa satisfacción de que Lugo teña voz directa nunha área tan importante dentro do Grupo Popular no Senado”, concluíu.