O BNG denuncia que o Centro de Saúde do Valadouro volve quedar cun só médico tras dous anos de recortes

O Valadouro, 12 de setembro, 2026. Tal como o BNG denunciara xa en febreiro deste ano —e tamén hai dous e tres anos—, a situación no Centro de Saúde do Valadouro, lonxe de mellorar, continúa empeorando. O concello leva dous anos sen os dous médicos que lle corresponden por cadro de persoal.

Tras as mobilizacións da veciñanza e despois de que o BNG levara o asunto ao Parlamento en abril de 2024, as prazas foran cubertas de maneira provisional. Porén, aquela solución resultou ser apenas un parche, unha resposta momentánea para acougar as protestas veciñais e as reclamacións do BNG. “Agora mesmo volvemos practicamente ao punto de partida de cando comezaran as mobilizacións: cun só facultativo en vez dos dous que nos corresponden, un facultativo que ademais atende moitas semanas de forma intermitente e cambiando a miúdo de médico”, afirmou o portavoz municipal Eduardo Chao. Engadiu tamén que “a pouco convincente resposta que lle deran ao noso deputado Daniel Castro no Parlamento xa facía prever que a solución ía ser un parche”.

Chao lembrou que a gravidade da situación non é algo puntual nin accidental, pois deriva de dúas xubilacións totalmente previsibles que non foron cubertas a tempo por quen tiña a responsabilidade de facelo.

Apoio ao persoal sanitario

O grupo municipal do BNG amosa o seu apoio a todas e todos os profesionais que traballan no Centro de Saúde do Valadouro, que tamén sofren esta situación e que, co seu esforzo, atenden todo o que poden.

Exixen a cobertura inmediata das prazas

Desde o BNG local esixen a cobertura inmediata das dúas prazas médicas e anuncian que levarán o tema ao vindeiro pleno. Non descartan convocar novas mobilizacións se estas prazas non son cubertas de xeito urxente. “Non imos permitir que o PP deixe ao Valadouro sen médicos”, afirmou o concelleiro nacionalista Eliseo Teijeiro.

Críticas ao PP do Valadouro

Chao e Teijeiro incidiron no “nulo compromiso” e no “inexistente traballo” do actual alcalde e do equipo de goberno do PP para recuperar os dous médicos que lle corresponden ao centro de saúde. “A dilixencia do señor Lamela non parece ser moita á hora de reclamar os dous médicos. Non sabemos se é porque non quere, non pode, non sabe ou porque lle mandan no seu partido estar calado”, afirmaron.

Tamén lembraron que a principios do verán o BNG levou a pleno unha moción para instar á Xunta de Galicia a non pechar 36 camas durante os meses de xullo, agosto e setembro no Hospital da Mariña. O señor Lamela e todo o Partido Popular do Valadouro votaron en contra.

Dous alcaldes en tres anos, pero dous médicos menos

Os nacionalistas tamén fixeron referencia á situación política do concello neste mandato, no que a exalcaldesa Mª José Fernández destituíu aos concelleiros do BNG e do PSOE, entregando a alcaldía ao PP. “Nestes tres anos xa houbo dous alcaldes, pero seguimos sen os dous médicos”, sinalan desde o BNG.

O BNG do Valadouro insiste en que levará este asunto ao pleno para que quede claro quen está coas demandas veciñais e quen está ás ordes de Rueda, “que non para de recortar servizos sanitarios, sobre todo en concellos pequenos”.

“Queremos saber tamén se a exalcaldesa está cos veciños e coas súas xustas demandas —pois anteriormente estivo na pancarta reclamando dous médicos— ou se está xa do outro lado, co PP que nos recorta servizos”, conclúen desde o BNG.