Lourenzá, 20 de maio de 2013. A corporación de Lourenzá aprobou hoxe en pleno a actualización do prezo das escolas deportivas municipais, que será de 54 euros por tempada. Tamén se acordou cobrar entrada polas visitas ao Centro de Interpretación da Faba.
Sobre a aprobación do expediente de modificación das ordenanzas que regulan as taxas pola prestación de servizos das escolas deportivas municipais a portavoz do goberno municipal, Lupe Flórez, explicou que “como fora unha das taxas que quedara sen actualizar nos pasados plenos o equipo de goberno propuxo actualizar o prezo por ese servizo e tivemos en conta o das escolas deportivas de Mondoñedo, xa que temos un convenio firmado con eles e moitas das actividades desenvolvémolas de maneira conxunta. Actualmente os nenos estaban pagando uns 4 euros cuns céntimos mensuais, non chegaba aos 5 euros, nun total de 9 meses, que é como está establecida a tempada. A partir de agora será un total de 6 euros mensuais, o que supón 54 euros a tempada. Mantemos a posibilidade de que se poida facer nun pago único ou en dous pagos fraccionados. Pensamos que non é un prezo excesivo por todos os servizos que se ofrecen dende as escolas deportivas e pretendemos que esta pequena actualización contribúa un pouquiño a sufragar o custo do servizo, que non se autofinancia por si mesmo”.
Lupe Flórez engadiu que “neste punto da orde do día os votos foron de 6 a favor, por parte do grupo municipal do PP; os tres concelleiros presentes do PSOE, pois faltaba un, e o do BNG votaron en contra. Os seus argumentos baséanse en que consideran que a oferta das escolas deportivas en Lourenzá pode chegar a ser excesiva para un concello da nosa entidade poboacional. Non puxeron reparo á taxa económica, pero din que temos unhas escolas, segundo eles, semiprofesionais que igual son excesivamente ambiciosas para o noso concello. Os nosos argumentos foron que a idea das escolas deportivas xa no seu nacemento consistía en ofertarlle unhas opcións de ocio para o tempo libre da xuventude laurentina e observamos que ao longo destes anos que levan funcionando, case van dúas décadas, demostrouse que é algo totalmente positivo e beneficioso para os xoves de Lourenzá. De feito non só ter un ocio lúdico positivo que nos afasta doutras actividades nocivas para a saúde é beneficioso, senón que o propio sentimento de equipo crea un arraigo entre a xuventude de Lourenzá, que é para nosoutros o obxectivo último dunhas escolas deportivas: crear equipo e unión entre os xoves laurentinos, aparte do que supón o esforzo da competición, o afán de superación dun mesmo, o compañeirismo nas viaxes de equipo, etcétera”.
Flórez tamén aclarou que “moitos dos gastos que se recollen no expediente non son achacables ás escolas deportivas, senón que nós temos unhas instalacións de carácter deportivo (o pavillón municipal e o campo de fútbol) que son utilizados por usuarios alleos ás propias escolas deportivas, que están a pagar unhas taxas pola súa utilización. Temos grupos de xente que xogan ao fútbol sala ou ao bádminton que pagan as súas correspondentes taxas de uso, pero como eses ingresos non son cotas das escolas deportivas non se contemplan como ingresos a reducir no gasto xenérico do deporte en Lourenzá. E por outra parte hai outra serie de actividades, pois préstanselle as instalacións do pavillón á escola municipal de música e danza para os ensaios de canto, baile e pandeireta; o exceso de peregrinos que non podemos acoller no albergue oficial que temos xestionado co Xacobeo derívase as instalacións do pavillón municipal e cóbrase a pertinente taxa (de 3 euros para os que dormen no chan e 5 euros para os que usan liteira noutra dependencia anexa ao pavillón), co cal hai que ter en conta que hai unha serie de ingresos que non contan como actividade deportiva pero si redundan nas propias instalacións de carácter municipal. Os propios nenos do colexio utilizan nas horas de educación física o pavillón municipal porque está anexo as dependencias do centro”.
Por todo isto o goberno local de Lourenzá considera que “está suficientemente xustificado, pois aínda que a taxa non sufrague ao cen por cen o custe das escolas deportivas para nós o feito de ofrecer unha gama de deportes e actividade lúdica para os nenos e a xuventude de Lourenzá realmente vale a pena. Igual hai que facer un axuste noutro tipo de gastos accesorios ao que é o propio deporte sen que teña que verse condicionado o funcionamento das escolas deportivas”.
No pleno de hoxe tamén se aprobou a creación da taxa para as visitas ao Centro de Interpretación da Faba que “é unha cantidade simbólica e inclúe un prezo especial para colexios coa intención de ofrecérllelo de cara ao próximo curso escolar aos centros educativos da Mariña. O prezo por visitante é de 1,50 euros, pero para menores de 18 anos e maiores de 65 ou xubilados é de 1 euro, cantidade que se fixou tamén para cada compoñente dos grupos de máis de dez persoas. Para os grupos de escolares é de 12 euros por cada 50 alumnos”. Este asunto foi aprobado por unanimidade.
Ademais na sesión plenaria tratouse unha moción presentada polo BNG sobre as deficiencias do alumeado público. “Neste punto propuxemos un cambio na moción que el presentou engadindo que o Concello elaborará un informe técnico das deficiencias para tratar de solucionalas dentro das súas posibilidades económicas e coa máxima prioridade posible. Unha vez refeita aprobouse por unanimidade”, explicou Lupe Flórez.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
Estiveron acompañados polas dúas técnicas de Xuventude, para gozar dunha mañá nas distintas actividades que ofrece este parque de trampolíns. Pola tarde, o grupo parou a xantar no Lago das Pontes, onde puido coñecer a historia da súa creación e desfrutar dun baño. A viaxe estivo organizada polas Concellerías de Xuventude e Deporte e pola Oficina de Información Xuvenil dentro do programa “Verán a Tope en Xove 2026”.
Evaristo Calvo, Rebeca Montero e Vítor Mosqueira interpretaron o pasaxe que recrea os últimos momentos do Mariscal Pardo de Cela e da súa muller, Isabel de Castro, antes da traizón da Frouseira. A acción cultural, coordinada por Carme Varela e promovida pola Vicepresidencia da Deputación de Lugo, rende homenaxe ao gran dramaturgo do Valadouro no seu primeiro cabodano. 
