Os populares de Mondoñedo esíxenlle ao bipartito local que “goberne e deixe de escudarse en problemas do pasado”

1.- O Grupo Local do Partido Popular cumprindo coa súa labor de oposición viuse obrigado a denunciar e facer públicos diferentes erros cometidos polo equipo de goberno do Concello de Mondoñedo froito dunha xestión despreocupada que está a dar como resultado unha situación caótica na facenda local.

2.- O Concello de Mondoñedo resultou sancionado pola Axencia Tributaria por non ingresar as retencións a conta do IRPF das nóminas dos traballadores durante o exercicio 2010, e pola Xefatura Provincial de Tráfico por circular cun vehículo cuxos neumáticos non presentan debuxo nas ranuras principais da banda de rodamento.

3.- Asemade, o descontrol de Orlando González provoca que as obras do Vilar non conten coa correspondente autorización urbanística, ao igual que o Centro da Interpretación da Cova do Rei Cintolo que non ten a oportuna autorización autonómica, a pesar de que as obras xa están comezadas.

4.- Ante esta situación, o PP local pídelle ao equipo de goberno que SOLUCIONE OS PROBLEMAS DO PRESENTE, que son a súa responsabilidade, sen escudarse en desculpas do pasado.

5.- O BNG e o PSOE no Concello de Mondoñedo teñen a obriga de GOBERNAR, e deben saber que os erros do pasado –no caso de que existisen- non xustifican os presentes.

6.- O PP local lamenta que o equipo de goberno de Mondoñedo e con el o rexedor local, Orlando González, estea a amosar unha actitude que semella estar máis preocupado de buscar errores pasados, que de resolver os problemas presentes.

7.- De ser certos eses erros, polos que xa tería pagado o Partido Popular as súas consecuencias, e dos que tanto alardea o equipo de Goberno; a responsabilidade do bipartito é a de non cometelos, e agora o seu deber sería dar explicacións aos mindonienses, que ao final son os que asumen os custes da mala xestión do goberno local.

8.- Polo tanto, o pp local esixe ao bipartito local que GOBERNE, que traballe a prol dos intereses dos mindonienses e que deixe de escudarse en posibles problemas pasados.

Comunicado do PP de Mondoñedo